Syrtqy ister ministri Qairat Ábdirahmanov Qazaqstannyń Ózbekstandaǵy elshisiniń biýdjet qarjysyn jymqyrdy dep aiyptalýyna qatysty túsinikteme berdi, dep habarlaidy Sputnik Qazaqstan tilshisi.
"Astana aýdanaralyq sotynan qyzmetinen ýaqytsha shettetý qajettigi týraly uiǵarym aldyq. Jarlyq sotta sybailas jemqorlyqqa qarsy is-qimyl ulttyq biýrosy materialdary negizinde ázirlendi. Bul jaǵdai syrtqy ister ministrligi men vedomstvoǵa baǵynyshty mekemelerdiń burynǵy qyzmetkerlerine qatysty júrgizilip jatqan tergeýmen bailanysty. Osyǵan bailanysty bizdiń Ózbekstandaǵy elshiniń esimi de aitylyp otyr", — dedi Ábdirahmanov úkimet kýlýarynda.
Ol úsh jyl buryn ótken keńeitilgen alqa otyrysynda Nursultan Nazarbaev ministrliktegi qarjylyq-sharýashylyq qyzmetti tártipke keltirýdi tapsyrǵanyn atap ótti.
"Biz barlyq baqylaýshy organdarmen belsendi jumys isteýdemiz. Ulttyq biýroǵa istiń tolyq ári obektivti tergelýi boiynsha kómek kórsetip jatyrmyz", — dedi ministr.
Ábdirahmanovtyń pikirinshe, bul jaǵdai Qazaqstannyń abyroi-bedeline nuqsan keltirmeidi.
"Tergeýdiń ashyq júrgizilýine, bolashaqta mundai oqiǵalardyń qaitalanbaýyna ózimiz de múddelimiz. Barlyq aldyn alý sharasy qabyldanyp jatyr. Syrtqy ister ministrligi, úkimet te sybailas jemqorlyqqa qarsy is-qimyl men memlekettik qyzmetkerler tarapynan zańǵa qaishy áreketterge jol bermeý máselesinde ashyqtyqty ustanady", — dedi ol.
Eske sala ketsek, buǵan deiin memlekettik qyzmet isteri jáne sybailas jemqorlyqqa qarsy is-qimyl agenttigi Qazaqstannyń Ózbekstandaǵy elshisi asa iri kólemde biýdjet qarjysyn urlady dep aiyptalyp otyrǵanyn habarlaǵan edi.
Keshe memleket basshysynyń jarlyǵymen Erik Ótembaev Qazaqstan Respýblikasynyń Ózbekstan Respýblikasyndaǵy tótenshe jáne ókiletti elshisiniń laýazymdyq ókilettikterin atqarýdan ýaqytsha shettetildi.
