Mektep direktorlary 3 jyl saiyn attestatsiiadan ótip turýǵa mindettelip otyr. Bul synnan jaqsy nátije kórsetken basshylar ai saiyn ailyǵynyń 100 paiyzy kóleminde ústemeaqy alýy múmkin. QR Bilim jáne ǵylym ministri Ashat Aimaǵambetov Facebook paraqshasynda osy ózgeristerdiń qalai engizilip jatqanyn túsindirdi, dep habarlaidy QazAqparat.
Áýeli ol bir mektepke uzaq ýaqyt boiy direktor bolý úrdisine resmi túrde shekteý qoiylǵanyn eske saldy.
«Bir uiymda uzaq ýaqyt jumys isteitin mektep direktorlary úshin alǵash ret rotatsiia júiesi engizildi. Endi olar bir uiymda 7 jyldan artyq basshy bola almaidy. Rotatsiia bastaldy jáne jyl boiy júrgiziletin bolady.
Sondai-aq 2021 jyly bilim berý uiymdary direktorlary quramynyń sapasyn jaqsartý úshin naqty merzimder, kriteriiler, testileýdi engize otyryp, laýazymǵa taǵaiyndaýdyń jańa júiesi engizildi», - dep jazady Ashat Aimaǵambetov.
Sonymen birge, ol direktorlarǵa arnalǵan biliktilik sanattary qalai iske asatynyn túsindirdi.
«Olar óz jalaqysynan 30%-dan 100%-ǵa deiin ai saiynǵy ústemaqy ala bastady. Bul qalai jumys isteidi? Ár 3 jyl saiyn direktor attestatsiiadan ótýge mindetti. Attestattaý nátijesi boiynsha basshy sanattardyń birin alady, onymen birge 3 jylǵa jáne ai saiynǵy qomaqty ústeme aqy (jalaqynyń 30%-dan 100%-ǵa deiin) taǵaiyndalady. Jumys tiimdiligi óte tómen bolǵan jaǵdaida basshy jumystan shyǵarylady», - dedi Bilim jáne ǵylym ministri.
