Densaýlyq saqtaý ministri Ajar Ǵiniiat Mańǵystaý oblysynda bir aptaǵa jýyq jumysqa shyqpaǵan feldsherler men jedel járdem júrgizýshilerine qatysty jaǵdaidyń qalai sheshilgenin aitty, - dep habarlaidy Tengrinews.kz agenttigi.
"Osy jyldan bastap meditsinalyq emes qyzmetkerlerdiń jalaqysy 20 paiyzǵa ósti. 2025 jylǵa deiin jyl saiyn 20 paiyzǵa arttyrylatyn bolady. Ótken jyldan bastap meditsina qyzmetkerleriniń jalaqysy ósti, biyl densaýlyq saqtaý júiesindegi meditsinalyq emes qyzmetkerlerdiń jalaqysy kóterildi. Bizde dárigerlerdiń ortasha jalaqysy - 350 myń teńge, orta meditsinalyq qyzmetkerlerdiń jalaqysy - 230 myń bolsa, júrgizýshiler 100 myń alady. Biz birtindep kóteretin bolamyz", - dedi Ǵiniiat.
Biraq ol narazylyqqa shyqqan júrgizýshilerdiń jalaqysyn dárigerler deńgeiine deiin, iaǵni 350 myń teńgege deiin kóterýdi talap etkenin túsindirdi.
"Bul múmkin emes. Densaýlyq saqtaý júiesindegi jalaqy osyndai. Kez kelgen maman jumysqa qabyldanǵan kezde, jalaqy shartta kelisiledi. Olar osy aqyǵa kelisimmen jumysqa ornalasty. Búgingi kúni oqiǵa aiaqtaldy, túsindirý jumystary júrgizilip jatyr. Olar jumysqa shyqty", - dedi ministr.
