© Sputnik / Vladislav Vodnev
Tótenshe jaǵdailar ministri Iýrii Ilin búgin Lenin shahtasynda bolǵan apattyń hronologiiasyn jariialady, dep habarlaidy Sputnik Qazaqstan.
Túngi saǵat 02:55-te kenshilerdiń ózderi qońyraý shalyp, jerdiń astynda 746 metr tereńdikte metan jarylǵanyn aitty. Qazirgi boljamǵa sáikes, bas kezinde órt shyqpaǵan. Kontsentratsiiasy 5 protsent bolǵan. Artynan gaz tutanyp ketken. Shahtada dispetcher birden apattyq jaǵdaidy joiý josparyn engizgen.
"Jer astynda jalpy 106 kenshi bolǵan. Tórt adam aýrýhanaǵa jatqyzyldy. Qazirgi kezde olardyń jaǵdaiy turaqty, eshkim jansaqtaý bóliminde jatqan joq", - dedi Ilin óńirlik kommýnikatsiialar qyzmetinde ótken brifingte.
Qutqarýshylar tańǵy saǵat 05:40-ta úsh kenshiniń denesin tapty. 06:40-ta tórtinshi, al 09:09-da besinshi kenshi tabyldy. Qazirgi kezde sot-meditsinalyq saraptama taǵaiyndaldy. Mamandar kenshilerdiń neden qaitys bolǵanyn anyqtaidy.
"Kenshiler 746 metr tereńdikte jatqan kómir qabatyn daiyndap júrgen. Ondaida qyrtystyń astyndaǵy topyraq alynady da, odan keiin ony burǵylap, gazyn shyǵarady. Kómir qyrtysynda bolatyn metandy eki aidai shyǵarady. Sodan keiin ǵana kómir óndirý jumysy bastalady", - dep túsindirdi Ilin.
Qazirgi kezde arnaiy komissiia quryldy. Oǵan ministrdiń ózi jetekshilik etedi. Mamandar apattyń sebebin jáne mán-jaiyn anyqtaidy.
