Májilis depýtaty Berik Dúisenbinov syrtqy ister ministri Beibit Atamqulovtan Qytaidaǵy túzetý lagerleri men qamaýda jatqan qandastardyń máselesi qalai sheshilip jatqanyn surady, dep habarlaidy Sputnik Qazaqstan tilshisi.
Májilistegi úkimet saǵatynda depýtat Berik Dúisenbinov Qytaidaǵy qandastar máselesin kóterdi. Májilismen syrtqy ister ministri Beibit Atamqulovtan túzetý lagerleri men qorlyq kórgen, eline jete almai jatqan qandastardyń máselesin sheshý boiynsha qandai keshendi sharalar qolǵa alynǵanyn surady.
Atamqulovtyń málimetinshe, qazir Qytai Halyq Respýblikasynda 1,5 millionnan asa qazaq turady.
"Bizge kún saiyn Qytaidan birtalai málimet túsedi. Bul másele bizdiń erekshe nazarymyzda. Byltyr 2,5 myń qandasymyz Qazaqstanǵa oralýǵa ruqsat aldy. Al biyl qos azamattyq úshin 33 adam qamaýǵa alynǵan. Diplomatiialyq jumystardyń nátijesinde sonyń 20-syn elge qaitardyq", - dedi ministr depýtatqa bergen jaýabynda.
Sonymen qatar, onyń aitýynsha, ministrlikke qamaýda otyrǵan qazaqtar týraly 1387 aryz túsken. Ár túsken aryzdy jeke-jeke qarastyryp jatyrmyz, dep sendirdi Atamqulov.
"Bul másele búkil álemdegi musylmandardyń qulaǵyn shýlatyp jatyr. Qytaidyń óz saiasaty bar, birqatar diplomat sol lagerlerge baryp, óz kózderimen kórip qaitty. Búgingi tańda, bizge túsken málimet boiynsha, sol jerde ustalǵan qazaqtardyń sany 80 protsenke azaiǵan, bárin shetinen bosatyp jatyr. Biyl da qandastarymyz jeńildik aldy", - dedi ol.
Atamqulov syrtqy ister ministrligimen ǵana emes, ishki ister jáne basqa da quzyrly organdarmen úlken jumys júrgizilip jatqanyn atap ótti.
