Qazaqstannyń syrtqy ister ministri Qairat Ábdirahmanov Qytaida qiyndyqqa tap bolǵan qazaqtardyń máselesi qalai sheshilip jatqanyn aitty, dep habarlaidy Sputnik Qazaqstan.
23 maýsymda Astanada ótken Dúniejúzi qazaqtarynyń V quryltaiynda Germaniiadan kelgen qazaq Elbasyǵa Qytai úkimetiniń ondaǵy qazaqtarǵa qysym kórsetip, qandastarymyzdyń quqyqtaryn taptap jatqanyn jetkizgen bolatyn. Nursultan Nazarbaev bul jaǵdaidan habarsyz ekenin aityp, Syrtqy ister ministrligine máseleniń anyq-qanyǵyn anyqtaýdy tapsyrǵan edi.
"Jýyrda ótken qazaqtardyń quryltaiynda Elbasy Nursultan Nazarbaev syrtqy ister ministrligine, basqa tiisti vedomstvolarǵa máselele kóterilse, ony egjei-tegjei eki jaqty qarastyrý jóninde naqty tapsyrma berdi. Osy tapsyrmany oryndaý barysynda bizge resmi túrde málimet tússe, mindetti túrde Qytai tarapymen, olardyń syrtqy ister ministrligi, basqa da mekemelerdegi áriptesterimizben máseleni kóteremiz. Qazaq diasporasynyń sheteldegi múddeleri men quqyqtaryn qorǵaý — bul bizdiń tikelei mindetimiz", — dedi búgin syrtqy ister ministri Qairat Ábdirahmanov tilshilerdiń suraǵyna bergen jaýabynda.
Ol Qytaimen resmi úkimetaralyq deńgeide qarqyndy dialog ornaǵanyn atap ótti. Aitýynsha, eki jaqty kelissózder barysynda barlyq máseleler talqylanady.
"Quryltai qorytyndysy boiynsha Qytaidaǵy qazaqtar, onyń ishinde Shyńjań-uiǵyr avtonomiialyq aýdanynda resmi qujattar alý, shekarany kesip ótý úshin qolǵa tólqujat alý boiynsha qiyndyqtar kórip otyrǵanyn anyqtadyq. Qytaida memlekettik qyzmettegi qazaqtar tólqujat ala almai qinalyp júr. Osy máselelerdiń bárin egjei-tegjei zerdelep, saralap, qytailyq áriptesterimizben talqylap jatyrmyz", — dep málim etti ministr.
Ministr eki jaqty kelissózderdiń kún tártibin tolyq asha almaitynyn aitty.
