قازاقستاننىڭ سىرتقى ٸستەر مينيسترٸ قايرات ەبدٸراحمانوۆ قىتايدا قيىندىققا تاپ بولعان قازاقتاردىڭ مەسەلەسٸ قالاي شەشٸلٸپ جاتقانىن ايتتى, دەپ حابارلايدى Sputnik قازاقستان.
23 ماۋسىمدا استانادا ٶتكەن دٷنيەجٷزٸ قازاقتارىنىڭ V قۇرىلتايىندا گەرمانييادان كەلگەن قازاق ەلباسىعا قىتاي ٷكٸمەتٸنٸڭ ونداعى قازاقتارعا قىسىم كٶرسەتٸپ, قانداستارىمىزدىڭ قۇقىقتارىن تاپتاپ جاتقانىن جەتكٸزگەن بولاتىن. نۇرسۇلتان نازارباەۆ بۇل جاعدايدان حابارسىز ەكەنٸن ايتىپ, سىرتقى ٸستەر مينيسترلٸگٸنە مەسەلەنٸڭ انىق-قانىعىن انىقتاۋدى تاپسىرعان ەدٸ.
"جۋىردا ٶتكەن قازاقتاردىڭ قۇرىلتايىندا ەلباسى نۇرسۇلتان نازارباەۆ سىرتقى ٸستەر مينيسترلٸگٸنە, باسقا تيٸستٸ ۆەدومستۆولارعا مەسەلەلە كٶتەرٸلسە, ونى ەگجەي-تەگجەي ەكٸ جاقتى قاراستىرۋ جٶنٸندە ناقتى تاپسىرما بەردٸ. وسى تاپسىرمانى ورىنداۋ بارىسىندا بٸزگە رەسمي تٷردە مەلٸمەت تٷسسە, مٸندەتتٸ تٷردە قىتاي تاراپىمەن, ولاردىڭ سىرتقى ٸستەر مينيسترلٸگٸ, باسقا دا مەكەمەلەردەگٸ ەرٸپتەستەرٸمٸزبەن مەسەلەنٸ كٶتەرەمٸز. قازاق دياسپوراسىنىڭ شەتەلدەگٸ مٷددەلەرٸ مەن قۇقىقتارىن قورعاۋ — بۇل بٸزدٸڭ تٸكەلەي مٸندەتٸمٸز", — دەدٸ بٷگٸن سىرتقى ٸستەر مينيسترٸ قايرات ەبدٸراحمانوۆ تٸلشٸلەردٸڭ سۇراعىنا بەرگەن جاۋابىندا.
ول قىتايمەن رەسمي ٷكٸمەتارالىق دەڭگەيدە قارقىندى ديالوگ ورناعانىن اتاپ ٶتتٸ. ايتۋىنشا, ەكٸ جاقتى كەلٸسسٶزدەر بارىسىندا بارلىق مەسەلەلەر تالقىلانادى.
"قۇرىلتاي قورىتىندىسى بويىنشا قىتايداعى قازاقتار, ونىڭ ٸشٸندە شىڭجاڭ-ۇيعىر اۆتونومييالىق اۋدانىندا رەسمي قۇجاتتار الۋ, شەكارانى كەسٸپ ٶتۋ ٷشٸن قولعا تٶلقۇجات الۋ بويىنشا قيىندىقتار كٶرٸپ وتىرعانىن انىقتادىق. قىتايدا مەملەكەتتٸك قىزمەتتەگٸ قازاقتار تٶلقۇجات الا الماي قينالىپ جٷر. وسى مەسەلەلەردٸڭ بەرٸن ەگجەي-تەگجەي زەردەلەپ, سارالاپ, قىتايلىق ەرٸپتەستەرٸمٸزبەن تالقىلاپ جاتىرمىز", — دەپ مەلٸم ەتتٸ مينيستر.
مينيستر ەكٸ جاقتى كەلٸسسٶزدەردٸڭ كٷن تەرتٸبٸن تولىق اشا المايتىنىن ايتتى.
