Ishki ister ministri Marat Ahmetjanov qańtar oqiǵasy qaitalanýy múmkin be degen suraqqa jaýap berdi, dep habarlaidy Sputnik Qazaqstan.
Buǵan deiin IIM tergeý departamentiniń bastyǵy Sanjar Ádilov qańtar oqiǵasy kezinde urlanǵan qarýdyń aýqymdy arsenaly áli de qylmyskerlerdiń qolynda ekenin málimdegen edi. Osyǵan bailanysty jýrnalister ishki ister ministrinen qańtar oqiǵasy qaitalanýy múmkin be dep surady.
"Árine, qaýip árqashan bar. Urlanǵan qarý-jaraqtyń bir bóligi áli qylmyskerlerdiń qolynda. Búginge deiin, qatelespesem, bir jarym myń qarý tárkilendi. Kúni keshe Almaty qalasy men Almaty oblysynda qarý-jaraq qoimasy tabyldy. Jedel jumys júrgizilip jatyr. Azamattardan qarý satyp alý sharasy júrgizildi. Halyqtan myń shaqty qarý satyp aldyq", - dedi Ahmetjanov Májilis kýlýarynda.
Aitýynsha, urlanǵan qarý, negizinen, ońtústik óńirlerde, Almaty qalasynda shoǵyrlanǵan. Biraq, ministr bul qarý-jaraq basqa óńirlerge de tasymaldanýy múmkin ekenin joqqa shyǵarmady.
"Sol sebepti el ishinde de, elden tys aýmaqta da jedel tergeý sharalary júrgizilip jatyr. Sizder qańtar oqiǵasy týraly aityp otyrsyzdar... Eger qolda qarý bolsa, odan kez kelgen ýaqytta oq atylýy múmkin. Sol sebepti barlyq sharany qolǵa alamyz. Eń sońǵy qarý tabylǵanǵa deiin jumys isteimiz", - dedi Ahmetjanov.
1 maýsymda IIM jappai tártipsizdikter kezinde qarý-jaraq dúkenderi men quqyq qorǵaý organdarynyń ákimshilik ǵimaratynan 2 900-den astam qarý, sondai-aq 63 180 oq-dári urlanǵanyn habarlady.
Urlanǵan qarý arasynda 35 granatomet, 8 pýlemet, 268 avtomat, 17 vintovka, 594 tapansha, 98 arnaiy myltyq jáne 239 travmatikalyq tapansha bar. Búginde 1 554 qarý men 39 myńnan astam oq-dári tárkilengen. Olardyń arasynda 10 granatomet, 6 pýlemet, 158 avtomat, 348 tapansha, 113 arnaiy myltyq, 216 travmatikalyq tapansha jáne basqalary bar.
