QR Densaýlyq saqtaý ministri Eljan Birtanov Almatynyń ortalyq qalalyq klinikalyq aýrýhanasynda koronavirýstyń taralýyna bailanysty júrgizilgen komissiia tekserisiniń nátijesin jariia etti, dep habarlaidy "Ult aqparat".
«2020 jyldyń 5-14 mamyry aralyǵynda 14 adamnan, onyń ishinde ulttyq jáne halyqaralyq deńgeidegi epidemiologtardan, sondai-aq meditsina qyzmetkerleri kásipodaǵynyń, Almaty qalasy ákimdiginiń qoǵamdyq keńesiniń, meditsinalyq qaýymdastyqtardyń ókilderinen jasaqtalǵan komissiia Almatydaǵy ortalyq qalalyq klinikalyq aýrýhanada koronavirýs infektsiiasynyń taralýy faktisi boiynsha tekserý júrgizdi. Búgin osynaý epidemiologiialyq tekserýge qatysty qorytyndyny aldym. Nátijesinde mundai buzýshylyqtardy joiýǵa qatysty usynys ázirlendi», - dep jazdy ministr Facebook-paraqshasynda.
Eljan Birtanov orynbasary Liýdmila Biýrabekovaǵa Almatyǵa baryp, komissiia sheshimin jáne buzýshylyqtardy joiý boiynsha qabyldanatyn sharalardy tanystyrý úshin uiym basshylyǵymen, meditsina qyzmetkerlerimen kezdesýdi tapsyrǵanyn atap ótti.
«Birlesip baǵalaý ári munan ary sheshim qabyldaý úshin bul málimetterdiń prokýratýraǵa beriletindigin de atap ótken mańyzdy. Buǵan qosa, jergilikti Densaýlyq saqtaý basqarmasynyń basshysyna meditsina qyzmetkerlerin nysanǵa sanitarlyq tazalaý jumystary júrgizilgen kezeńde jáne kópbeiindi statsionar jumysyn burynǵy rejimde jandandyrǵanǵa deiin qalanyń basqa meditsinalyq uiymdaryna jumysqa ornalastyrý, sonymen qatar qosymsha jalaqy tóleý jáne áleýmettik qoldaý máselelerin sheshýdi tapsyrdym», - dedi ol.
Ministrdiń aitýynsha, Ortalyq qalalyq klinikalyq aýrýhananyń koronavirýspen aýyrǵan qyzmetkerlerine tólem jasaý jumysqa ýaqytsha jaramsyzdyq paraǵyn usynǵannan keiin júrgiziletin bolady.
«11-23 sáýir kúnderi infektsiialyq, provizorlyq jáne karantindik jaǵdaida jumys atqarǵan ortalyqtyń 350 qyzmetkerine infektsiialyq jáne provizorlyq naýqastarmen jumys istegeni úshin jalaqylaryna jalpy somasy 59 mln teńge ústemeaqy tólendi», - dedi Eljan Birtanov.
Aita keteiik, Almatyda koronavirýs juqtyrǵan meditsina qyzmetkerleriniń sany kúrt artqan bolatyn. Olardyń deni Ortalyq qalalyq klinikalyq aýrýhananyń mamandary ekeni aityldy.
Osyǵan orai, QR Densaýlyq saqtaý ministrliginiń tapsyrmasymen arnaiy komissiia qurylyp, aýrýhanada tekseris bastaldy.
22 sáýirde Ortalyq qalalyq klinikalyq aýrýhana jumysyn toqtatqany habarlandy.
