Búgin QR Ǵylym jáne joǵary bilim ministri, Halyqaralyq Túrki akademiiasy ǵylymi keńesiniń tóraǵasy Saiasat Nurbek buryn zerttelmegen kóne túrki eskertkishterin tapqan túrkolog ǵalymdardy marapattady, dep habarlaidy QazAqparat.
QR Ǵylym jáne joǵary bilim ministrliginiń baspasóz qyzmetinen málim etkendei, Mońǵoliianyń Ǵylym akademiiasy Tarih jáne arheologiia institýtynyń arheology A. Enhtórge, túrkolog ǵalymdar N. Bazylhan men N. Bógenbaevqa ministrliktiń «Ǵylymdy damytýǵa sińirgen eńbegi úshin» tósbelgisi tabystaldy. Sondai-aq atalǵan ǵalymdarǵa jáne Halyqaralyq Túrki akademiiasynyń prezidenti Darhan Qydyrálige ministrdiń alǵys hattary berildi.
Mońǵoliianyń Nomgon óńirinde júrgizilgen ǵylymi arheologiialyq ekspeditsiianyń nátijeleri 24 tamyz kúni jariialanǵan bolatyn. Ekspeditsiiany Halyqaralyq Túrki akademiiasy men Mońǵoliia Ǵylym akademiiasynyń Arheologiia institýty birlesip júrgizdi.
«Nomgondaǵy qazba jumystarynyń barysynda Ortalyq Aziiadaǵy Shyǵys túrkileriniń qaǵan-kniaz tipindegi memorialdyq keshenderin ereksheleitin negizgi arhitektýralyq komponentterden turatyn túrki dáýiriniń buryn belgisiz bolǵan taǵy bir eskertkishi ashyldy. Kóne túrkilik rýna jáne soǵdy tilinde qashalǵan jazýy bar bitiktastyń bir bóligi, tasbaqa tuǵyry, antropomorfty bádiz bóligi (qaǵannyń jartylai beinesi) jáne zoomorfty músinder (arystan men qoi músinderi) jáne taǵy basqasy tabyldy», - delingen ministrlik málimetinde.
Ministr Saiasat Nurbek bul jańalyqtyń mańyzdylyǵyn atap ótip, halyqaralyq ekspeditsiia múshelerine túrkologiiaǵa jáne álemdik ǵylymǵa qosqan úlesi úshin alǵys bildirgen.
