Midjourney neiron jelisi arqyly jasalǵan keskin
Mádeniet jáne aqparat ministri Aida Balaeva hidjabqa qatysty málimdeme jasady, - dep habarlaidy Tengrinews.kz tilshisi.
"Men ministr retinde dini taqyrypty ádeii paidalanaýǵa qatysty alańdaimyn. Bul adamdardyń sezimi men senimine qatysty bolǵandyqtan, bolmaidy. Biz jáne jýrnalister bul taqyrypty óte muqiiat qamtyp, egjei-tegjeiin, mán-jaiyn naqtylaýymyz kerek, óitkeni qazir hidjabqa tyiym salý týraly aitylyp jatyr. Biraq bul týraly áńgime bolǵan joq.
Áńgime nikab, paranja jáne betti jaýyp turatyn, sol arqyly adamdy anyqtaýdy jáne sáikestendirýdi qiyndatatyn dini kiimderge tyiym salý týraly bolyp otyr", — dedi Balaeva.
Ministr betti jaýyp turatyn kiimge tyiym salý qaýipsizdik turǵysynan mańyzdy ekenin atap ótti.
"Qazir álemniń barlyq órkenietti eli osy jolmen júrip kele jatyr, qai jerde tyiym salǵanyn qarańyzdar. Men memleket zaiyrlyq pen dini senim bostandyǵy qaǵidattarynan eshqashan bas tartpaitynyn túsindirgim keledi, óitkeni bul bizdiń Konstitýtsiiamyzda jazylǵan. Muny qoǵamǵa jetkizý mańyzdy, óitkeni qazir túrli oqýlar kóbeiip, halyqtyń bir bóligi alańdap, resmi ótinishter nemese keibir petitsiialarǵa qol qoia bastaidy", - dedi Balaeva.
Ol Mádeniet jáne aqparat ministrligi din salasyndaǵy ýákiletti organ retinde Úkimetke Májilis pen Senat depýtattarynan túsken ótinishterdi jan-jaqty zertteitinin aitty.
"Osy máselelerdiń barlyǵy talqylanady, ministrlik janyndaǵy Qoǵamdyq keńes bar, sarapshylyq keńester bar. Zańnamalyq ózgeristerdi talap etetin máselelerdiń bári jai ǵana qabyldanbaidy, birinshi kezekte sarapshylar arasynda pikirtalas, qoǵam arasynda pikirtalas bolady, sodan keiin ǵana naqty sharalar qabyldanady", - dedi Balaeva.
Ministrdiń aitýynsha, qoǵamdaǵy birlik pen qaýipsizdiktiń basym máseleleri kún saiyn jańaryp otyrady.
"Eldegi qaýipsizdikke tek memleket ǵana emes, árbir adam jaýapty ekenin túsinýimiz óte mańyzdy. Bul aqparat taratýǵa, bizdiń is-áreketimizge qatysty. Bul suraqtar búgin qoiyldy, men osyny túsindirgim keledi", - dedi ol.
Balaeva mektepterde hidjab kiiý máselesine núkte qoiylǵanyn aitty.
"Biz - zaiyrly memleketpiz, mektep formasyna qatysty biryńǵai standartty kózdeitin ýákiletti organnyń buiryǵy bar. Sózsiz", - dep qorytyndylady ministr.
