QR Premer-ministriniń birinshi orynbasary - Qarjy ministri Álihan Smaiylov Qazaqstanda aldaǵy ýaqytta benzinniń nelikten qymbattaitynyn túsindirdi, - dep habarlaidy "Ult aqparat".
"Benzin litrine 10 teńgege qymbattaidy dep boljanyp otyr. Bul - shamamen 6 paiyz. Infliatsiiaǵa eleýli áser etpeýi kerek, alaida baǵanyń ósýi turaqty kún tártibinde tur, áleýmettik mańyzy bar azyq-túlik ónimderine baǵany ustap turý úshin barlyq sharany qoldaný qajet", - dedi Smaiylov jýrnalisterdiń suraqtaryna jaýap bere otyryp.
Buǵan deiin ol benzinge aktsizdiń artýy qandai faktorlarǵa bailanysty ekenin túsindirgen.
"Bizde kelesi jyly áleýmettik sala shyǵyndary ósedi. Respýblikalyq biýdjet jobasynda osy salaǵa 6 trillion teńge qarastyrylǵan, biyl 5,3 trillion teńge bolǵan. Pedagog mártebesin arttyrý týraly zań qabyldanyp jatyr, tórt jyl ishinde eki ret muǵalimderdiń, balabaqshalardyń, kolledjderdiń tárbieshileriniń jalaqysyn kóterý josparlandy. Kelesi jyly bul kórsetkish 25 paiyzǵa jetedi. Barlyǵy qosymsha aqsha talap etedi. Bul rette biz mikro jáne shaǵyn biznes sýbektilerin tabys salyǵynan úsh jylǵa bosatý esebinen kiris bóligin qysqarttyq. Sondyqtan da bul - aktsizdiń qainar kózi, biraq bul basty qainar kózi emes", - dep túsindirdi Smaiylov Úkimet otyrysynda.
Ol basty qainar kóz dep kedendik jáne salyqtyq ákimshilendirýdi atady.
"Respýblikalyq biýdjettiń kirisi ótken jylmen salystyrǵanda 10 aida 911 milliard teńgege ósti. Jalpy jyl boiynsha respýblikalyq biýdjetke túsken túsimderdiń 1,2 trillion teńgege ósýi kútiledi. Onyń ishinde 840 milliard teńge kedendik jáne salyqtyq ákimshilendirýdi jaqsartý esebinen. Aktsizderdiń ósýi kelesi jyly kiris bóliginiń ulǵaiý faktorlarynyń biri bolady. Bul qosymsha 50 milliard teńgeden astam qarjyny jinaýǵa múmkindik beredi.
"Búginde bizde AI-92 litriniń baǵasy litrine 163 teńge, al Reseide teńgelik mánde litrine 260 teńge. Bizde respýblikadan RF-ǵa munai ónimderin jappai shyǵarý júrip jatyr. Biz avtomobil kóligimen áketýdi shekteý boiynsha sharalar qabyldaýǵa májbúr boldyq. Sondyqtan benzin baǵasyń ósýi aitarlyqtai emes, biraq osy eki faktorǵa bailanysty bolýy kerek edi", - dep tolyqtyrdy Smaiylov.
