QR Premer-ministriniń orynbasary - saýda jáne integratsiia ministri Baqyt Sultanov Qazaqstan-Resei shekarasynda júk kólikteriniń jinalyp qalýyna qatysty túsinik berdi, - dep habarlaidy "Ult aqparat" Úkimettiń Telegram paraqshasyna silteme jasap.
"Qazaqstan-Resei shekarasynda júk kólikteriniń jinalyp qalýyna bailanysty aqparatty túsindirgim kelip tur. Mashtakovo/Syrym shekara beketinde Qazaqstanǵa kirý úshin kezegin kútken kólik sany az emes. Qazir jelide Resei ótkizbeidi, Qazaqstan kirgizbeidi degen túrli habarlama tarap jatyr. Bul aqparattyń shyndyqqa janaspaitynyn habarlaimyn.
Kólikterdiń turyp qalýyna sońǵy birneshe aptadaǵy aýa raiynyń qolaisyzdyǵy sebep. Bul aimaqta shamamen 10 kún boran boldy, kóktaiǵaqqa bailanysty joldar jabyldy. Aýa raiynyń qalypqa kelýimen júk kólikteriniń barlyǵy birden Reseidiń Mashtakovo ótkizý beketine kelip, kóp shaqyrymdyq kezek qurdy. Oǵan qosa, 16-17 naýryzda bolǵan qarly boran kezinde Qazaqstannyń «Syrym» shekara beketinde elektr jaryǵy úzilgen. Qazaqstan tarapynan taýardyń keshigýine osy sebep boldy", - dep málimdedi Sultanov.
Degenmen ministr qazir joldardyń qaita ashylǵanyn aitady.
"Sonymen qatar, júkterdi shekaradan ótkizý protsesin jeńildetý maqsatynda qazir biz veterinariialyq inspektorlardyń shekara beketiniń aýmaǵyna kirýine ruqsat berý múmkindigin pysyqtap jatyrmyz. Bul júrgizýshilerdiń jeke veterinarlyq baqylaý beketine ainalyp ótý qajettiligin joiady jáne transshekaralyq saýda protsesin jedeldetedi.
Dostar, men shekara transshekaralyq saýdadaǵy jaǵdaidy qadaǵalap otyramyn jáne reseilik áriptesterimizben únemi bailanystamyn. Qandai da bir qiyndyqtar týyndaǵan jaǵdaida, biz olardy joiý boiynsha jedel sharalar qabyldaimyz", - dep sendirdi ministr.
