Bilim jáne ǵylym ministri Ashat Aimaǵambetov qazaqstandyq oqýshylardyń úlgerim jaǵynan halyqaralyq zertteýge qatysý nátijeleri týraly pikir bildirdi, dep habarlaidy "Ult aqparat".
«Jalpy taldaý ár oblys boiynsha júrgizildi. Onyń qorytyndysyn óńirlerge joldaýǵa daiynbyz. Áriptestermen bul máseleni jumys tártibinen bólek te talqylaǵan edik. Jumysty ary qarai jandandyrý kerek. Jalpy Jambyl oblysy oqýshylarynyń PISA zertteýine qarasaq ta, TIMSS zertteýiniń nátijesine qarasaq ta, respýblikalyq olimpiadalardyń qorytyndysy boiynsha da kórsetkishteri óte joǵary. Bizde keibir tereń úńilip qaramaityn baiqaýshylar bar: olar osy zertteýlerdiń qorytyndysyn qarap, qazaq tilindegi mektepterdiń kórsetkishteri tómenirek degen tujyrymdamaǵa keledi. Biraq ol durys emes ekenin kórip otyrmyz», - dedi Ashat Aimaǵambetov Bilim jáne ǵylym ministrliginiń apparat otyrysynda.
Ministrdiń aitýynsha, mektepterdiń úlgerimi – tilge bailanysty másele emes, jalpy uiymdastyrýǵa, jumysty durys tártipke qoiý isine tikelei qatysty.
«Mysaly TIMSS zertteýi boiynsha búgingi tańda Jambyl oblysy kósh bastap tursa, onda negizinen memlekettik tilde oqityn balalar osy nátijege qol jetkizip otyr. Sondyqtan eń basty másele tilge qatysty emes. Jambyl oblysynyń tájiribesin zerttep, basqa da óńirlerge taratýymyz kerek», - dedi Ashat Aimaǵambetov.
