© Sputnik / Bolat Shaihinov
Ádilet ministri Qanat Mýsin BAQ ókilderiniń Qairat Satybaldyulynyń ustalýyna qatysty suraǵyna jaýap berdi, dep habarlaidy "Ult aqparat" QazAqparat agenttigine silteme jasap.
Oǵan «Qairat Satybaldynyń ustalýy QR Tuńǵysh Prezidenti týraly zańǵa qaishy kele me?» degen suraq qoiyldy.
«Eń aldymen zań otbasy múshelerin aiqyndaidy. Al nemere týystary buǵan kirmeidi. Ekinshiden, qatelespesem, «Tuńǵysh Prezident týraly» Zańda Tuńǵysh Prezidentti, onymen birge turatyn otbasy múshelerin qylmystyq jaýapkershilikke tartýǵa bolmaityndyǵy aitylǵan. Iaǵni, olarǵa aiyp taǵýǵa bolmaidy. Biraq tergeýge tyiym salynbaǵan», - dedi ol.
Ministrdiń aitýynsha, tergeý, qandai da bir is-qimyl bolýy múmkin.
«Zańda kórsetilgen tulǵalardy ustaýǵa jáne tutqyndaýǵa bolmaidy. Oǵan zań tyiym salady. Biraq olarǵa suraq qoiýǵa jáne jaýap alýǵa tyiym joq», - dedi Qanat Mýsin.
Sondai-aq, Ádilet ministrliginiń basshysy qazir kún tártibinde tuńǵysh prezident týraly zańdy qaita qaraý máselesi turǵan joq ekenin atap ótti. Aita keteri, bul zań Elbasy men onyń otbasynyń jaqyn múshelerin qorǵaidy.
Eske sala keteiik, 13 naýryzda sybailas jemqorlyqqa qarsy qyzmet Qairat Satybaldyulynyń ustalǵany týraly aqparat taratty. Ol "Qazaqtelekom" kompaniiasynyń qarajatyn asa iri kólemde jymqyrǵany úshin aiyptalyp otyr. Sondai-aq memleket qaýipsizdigine nuqsan keltiretin basqa da qylmystarǵa qatysy bar-joǵy tekserilýde.
Qairat Satybaldy Almaty áýejaiynda ustaldy. Ol Dýbaiǵa ushyp ketpek bolǵan.
Úsh kúnnen keiin reiderlik jolmen biznesti tartyp alý faktisi boiynsha onyń burynǵy áieli Gúlmira Satybaldy qamaýǵa alyndy.
