Aýyl sharýashylyǵy ministri Erbol Qarashókeev ortalyq kommýnikatsiialar qyzmetinde ótken brifingte qanttyń ádiletti baǵasy neshe teńge bolý kerektigin aitty, dep habarlaidy QazAqparat.
Onyń sózinshe, búginde qantty aimaqtarǵa jetkizýde qiyndyqtar týyp otyr.
«Bul jaǵdai qant baǵasynyń ósýine alyp keldi. Birjada qamys shikizaty qymbattaǵanyn atap ótý kerek. Kólik shyǵyndary, sondai-aq qaita óńdeý shyǵyndary da ósti.
Mysaly, qant quraǵynyń quny - shamamen 476 AQSh dollary. Bul 2020 jylmen salystyrǵanda 2 ese kóp. Logistika shyǵyndary 110 AQSh dollarynan 290 AQSh dollaryna deiin 2,6 ese ósti. Atalǵan faktiler otandyq qant zaýyttarynda quraq qantynyń ózindik qunynyń qymbattaýyna alyp keldi. Búgingi tańda zaýyttar 1 kilogramm qantty 450 teńgege satady. Bul rette 15% kóterme jáne bólshek saýda ústemesin eskere otyryp, qant quny shamamen kelisine 595-600 teńge bolýy qajet», - dedi vedomstvo basshysy.
Sondai-aq, ol qantty ádiletti baǵamen satpaýdyń saldarynan dúrbeleń týyndap, qantqa degen suranysty shekten tys arttyryp jibergeni týraly ýáj aitty.
«Jekelengen ákimdikter qantty ózindik qunynan tómen baǵamen satý faktileri de bolǵan. Mysaly, Pavlodar oblysynyń turaqtandyrý qory qantty 448 teńgege satyp alyp, 416 teńgege, al Qyzylorda oblysy 450 teńgege satyp alyp, 370 teńgeden qant satqan. Almaty oblysynda qanttyń bir kelisin 276 teńgeden, Aqtóbe oblysynda 363 teńgeden, Mańǵystaý oblysynda 400 teńgeden satqan. Ákimdikter tarapynan osy is-áreketter dúrlikpe suranys pen áleýmettik shielenistiń týyndaýyna ákep soqtyrýda», -deidi Erbol Qarashókeev.
Eske salsaq, Úkimettiń keńeitilgen otyrysynda Memleket basshysy Qasym-Jomart Toqaev qant tapshylyǵyn rettei almaǵan Saýda jáne integratsiia ministri Baqyt Sultanov pen Aýyl sharýashylyǵy ministri Erbol Qarashókeevke sógis jariialaǵan edi.
