Elimizde ǵana emes, álemde oryn alǵan jaǵdaiǵa bailanysty búgingi tańda internet máselesi kez kelgen salada mańyzdy bolyp otyr. Qashyqtan jumys isteý, qashyqtan bilim alý – munyń bári jaqsy, jyldam internetti talap etetin dúnieler. Osy oraida Qazaqstan Respýblikasy Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin bolashaqta internetke bailanysty problemalarǵa jol bermes úshin zańnamaǵa ózgerister engizý josparlanǵanyn atap ótti, - dep habarlaidy «Ult aqparat».
Ministrdiń aitýynsha, qazirgi tańda el arasyndaǵy radiofobiia internetpen qamtamasyz etetin bazalyq stantsiialardy ornatýǵa kedergi keltirip otyr.
«Qazirgi ýaqytta adamdardyń radiofobiiasy bar. Bul bizge internetti tolyqqandy jetkizýge kedergi jasaidy. Máselen, Family Village kesheninde 2-3 turǵynnyń aryzymen bazalyq stantsiia alynyp tastaldy. Osydan keiin turǵyndar internetke qosyla almai qinalǵan. Bailanys operatory bazalyq stantsiiany qaitadan ornatýǵa májbúr boldy», – dedi Mýsin úkimet otyrysynda.
Bolashaqta osyndai problemalarǵa jol bermes úshin ministrlik zańnamaǵa biraz ózgeris engizýdi josparlap otyr.
«Atap aitqanda, sonyń biri – kondominiýmderge bailanys obektilerin alyp tastaýǵa tyiym salý. Budan bólek, jańa úilerdi paidalanýǵa berer aldynda mindetti túrde optika jelisimen qamtamasyz etý kózdelgen. Sonymen birge, internet sapasyna halyqtyq baqylaý júrgizý úshin Bailanys.bar servisi iske qosyldy. Qazir ony 50 myńnan astam adam qoldanady», - dedi ministr.
Aita keteiik, búginde barlyq bilim alýshylar qashyqtan onlain oqyp jatqany belgili. Osy oraida internet máseleleri de shyǵa keldi. Kemshilikterdiń aldyn alý úshin Senat depýtaty Muhtar Qul-Muhamed qashyqtan oqyp jatqan bilim alýshylardy tegin internetpen qamtamasyz etýdi talap etken bolatyn. Bilimland.kz, Daryn.online jáne Kundelik.kz negizgi bilim berý platformalarynyń jumys isteý jyldamdyǵy tómen dep synǵa alǵan senat depýtaty olardy negizgi bilim berý platformalary ekenin atap ótti.
Esterińizge sala keteiik, Úkimet otyrysynda Qazaqstan Respýblikasy Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin bolashaqta internetke bailanysty problemalarǵa jol bermes úshin zańnamaǵa ózgerister engizý josparlanǵanyn atap ótken bolatyn. Elimizde ǵana emes, álemde oryn alǵan jaǵdaiǵa bailanysty búgingi tańda internet máselesi kez kelgen salada mańyzdy bolyp otyr. Qashyqtan jumys isteý, qashyqtan bilim alý – munyń bári jaqsy, jyldam internetti talap etetin dúnieler. Osy oraida ministrlik bolashaqta internetke bailanysty problemalarǵa jol berilmeý úshin jumys istep jatyr.
