Kollaj: azattyq-ruhy.kz
Eńbek jáne halyqty áleýmettik qorǵaý ministri Svetlana Jaqypova Qazaqstanda eń tómengi jalaqy nege 300 myń emes, 85 myń teńgeni quraitynyn aitty, dep habarlaidy Sputnik Qazaqstan.
"2018 jylǵa deiin eń tómengi jalaqy 28 myń teńge sheginde bolǵan. Biz bul eń tómengi jalaqy mólsherin áleýmettik eń tómengi standart retinde engizdik. Iaǵni, osy somadan tómen jalaqy tólenbeýi kerek.
2018 jyly ol 42 500 teńgege ósti, odan keiin ol 60, 70 myń teńgege ainaldy jáne kelesi jyly 85 myń teńge bolady. Bul kórsetkishti eń tómengi áleýmettik standart retinde qabyldaýymyz kerek jáne sáikesinshe jumys berýshilerdiń eshqaisysy osy kórsetkishten tómen tólemeýi kerek. Bul barlyq qazaqstandyqtar tek eń tómengi jalaqy alady degendi bildirmeidi", - dedi Svetlana Jaqypova brifingte.
Ministr eń tómengi jalaqy mólsheriniń ulǵaiýy shaǵyn jáne orta biznes ókilderine keri áserin tigizedi dep sanaidy.
"Qazaqstanda eń tómengi jalaqy 300 myń teńge bolǵany jaqsy bolar edi, biraq biz shaǵyn jáne orta biznes týraly oilaýymyz kerek. Olar eń tómengi jalaqydan mindetti tólemderdi de tóleýi kerek. Bul biznes úshin óte úlken júkteme bolady", - dep túsindirdi ol.
Ministrdiń aitýynsha, bul soma ázirlengen ádisnamaǵa sáikes anyqtalǵan, ol áli zańnamalyq turǵydan bekitilmegen.
"Biz ortasha jalaqyǵa jáne eńbek ónimdiligine bailanystyrdyq. Úshinshi fakt, nege 300 myń bolýy múmkin emes: biz biliktiligi joq nemese biliktiligi tómen eńbek úshin 85 myń teńge tólenetini týraly aityp otyrmyz. Iaǵni quzyrettilikke, daǵdyǵa jáne bilimge qoiylatyn talaptar joq", - dep qorytyndylady Svetlana Jaqypova.
Eske sala keteiik, Qazaqstan Prezidenti Qasym-Jomart Toqaev halyqqa Joldaýynda 2024 jyldyń 1 qańtarynan bastap eń tómengi jalaqy mólsherin 85 myń teńgege deiin arttyrýdy tapsyrǵan bolatyn. Bul - 1,8 millionǵa jýyq qazaqstandyqqa, onyń ishinde 350 myń biýdjet salasynda eńbek etetinderge tiesili.
