Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin elimizde internettiń sapasyna qatysty túsinik berdi, dep habarlaidy "Ult aqparat".
«Nege internet álsiz? Buǵan qatysty birneshe sebep bar.
Birinshiden, bizde internet sapasy boiynsha qatań zańnamalyq talaptar joq. Ekinshiden, telekommýnikatsiia jelisiniń 90 paiyzy radiorelelik jelide jáne áýe bailanys arnalary boiynsha salynǵan», - dedi ministr tsifrlandyrý taqyryby boiynsha Senatta ótip jatqan Úkimet saǵatynda.
Sonymen qatar Mýsin telekommýnikatsiialyq operatorlardyń qyzmetine tómen aiyppuldar belgilengenin atap ótti. Osy oraida tek 100 AEK somasynda ǵana aiyppul salynady.
Radiojiilik salasyndaǵy «latifýndizm» máselesine toqtalǵan ministr: «bul degenimiz - kishi telekom operatorlar ózderine radiojiilikter alyp, olardy qyzmet kórsetý úshin paidalanbaýda. Radiojiilik resýrstardy tiimdi qoldaný mańyzdy ekeni túsinikti. Biz arnaiy aýdit jasap, paidalanylmai kele jatqan jiilikterdi memleketke qaitaryp alýdy josparlaýdamyz. Biraq ol úshin tiisti standarttar men zańnamaǵa ózgerister engizý qajet», - dedi.
