Búgin halyq aldynda esep berý kezdesýinde QR Densaýlyq saqtaý ministri Aleksei Tsoi saladaǵy problemalardy atady, dep habarlaidy QazAqparat.
«Densaýlyq saqtaý salasynda kóptegen máseleler bar, olarǵa nazar aýdarý qajet. Salanyń birqatar mańyzdy kórsetkishteri tómendedi. Bul eń aldymen ana ólimine qatysty. Sondai-aq, júrek-qantamyr júiesi aýrýlarynan bolatyn ólim-jitimniń 15 paiyzǵa óskeni baiqaldy. Munyń bári koronavirýstyq infektsiianyń pandemiiasymen bailanysty», - dedi ministr Ortalyq kommýnikatsiialar qyzmetinde.
Onyń aitýynsha, osy problemalardy sheshý úshin buryn-sońdy bolmaǵan sharalar qabyldandy. Qysqa merzim ishinde azamattardyń densaýlyǵyn saqtaýǵa baǵyttalǵan aitarlyqtai kúshter men qarajat jumyldyryldy.
«Qazirgi ýaqytta densaýlyq saqtaý júiesi úshin negizgi basymdyq alǵashqy meditsinalyq-sanitariialyq kómektiń qoljetimdiligi men sapasyn qamtamasyz etý bolyp sanalady.
Búgingi tańda halyqqa meditsinalyq qyzmetterdi 7 myńnan astam ambýlatoriialyq-emhanalyq uiym kórsetedi, onyń ishinde memlekettik 59%, jeke menshik - 41%. Ýchaskelik dárigerdiń júktemesin azaitý úshin biz 2020 jyly qosymsha jalpy praktika dárigerleriniń 480 ýchaskesin ashtyq. Meditsinalyq kómektiń qoljetimdiligin qamtamasyz etý maqsatynda el óńirlerinde 63 ambýlatoriialyq-emhanalyq nysan salynyp, paidalanýǵa berildi. Meditsinalyq-sanitariialyq alǵashqy kómekti qarjylandyrý ótken jyly densaýlyq saqtaýdy qarjylandyrýdyń jalpy kóleminiń 52,4%-yna deiin jetkizildi. Bul rette, dárilik zattarǵa jazyp berilgen jeńildikti retseptiler sany 13,7 millionǵa jetti», - dedi A. Tsoi.
Sondai-aq, el halqy skriningtik zertteýlermen qamtamasyz etilgen, olardyń sany 2020 jyly 12 mln zerttep-qaraýdy qurady. Nátijesinde, 600 myńnan astam aýrý anyqtaldy.
«Qant diabeti, gipertoniia jáne júrek fýnktsiiasynyń sozylmaly jetkiliksizdigi boiynsha aýrýlarǵa qatysty baǵdarlamany iske asyrý jalǵasýda. 2020 jyly dinamikalyq baqylaýdaǵy patsientterdiń 55 paiyzy osy baǵdarlamaǵa qatysty. Biz mobildik meditsinany belsendi engizýdemiz. Úide meditsinalyq kómek kórsetý úshin mobildik brigadalardyń sany 3 myń 700-ge jetti, onyń 49 paiyzy aýylda. Bul rette, 2020 jyly olar 750 myńnan astam meditsinalyq qyzmet kórsetti. Bul úide KVI bar naýqastarǵa meditsinalyq kómek kórsetýde mańyzdy ról atqardy», - dedi ministr.
