Daǵystannyń densaýlyq saqtaý ministri respýblikada 650-den astam adamnyń "pnevmoniiadan" qaitys bolǵanyn habarlady. Olardyń arasynda 40 dáriger bar. Bul týraly bloger Rýslan Kýrbanovqa bergen suhbatynda ministr Jamalýdin Gajibragimov habarlady. Bul suhbat Instagram-da jariialandy.
Ministrdiń sózine qaraǵanda Daǵystanda sońǵy aqparat boiynsha, 12 myńnan astam adam aýrýhanadan tys jerde "pnevmoniiaǵa" shaldyqqan.
Resmi málimet boiynsha, respýblikada 3280 adamnan koronavirýs tabylǵan, 27 adam qaitys bolǵan. Iaǵni resmi túrde "pnevmoniiadan" kóz jumǵandar sany COVID-19 aýrýynan qaitys bolǵandardan áldeqaida kóp.
Ministr suhbat kezinde pnevmoniiamen aýyrǵandardy koronavirýs infektsiiasy juqqandar siiaqty emdeitinin rastady.
Buǵan deiin Reseidiń ózge aimaqtarynda da osyǵan uqsas oqiǵa bolǵany habarlanǵan.
Reseide resmi málimet boiynsha, koronavirýs infektsiiasynan 2500-den astam adam qaitys bolǵan, 270 myńnan astam adamnan virýs tabylǵan. Resmi túrde koronavirýstan qaitys bolǵandar sany ózge eldermen salystyrǵanda áldeqaida az.
Jaqynda britandyq Financial Times jáne amerikalyq New York Timesbasylymy Reseidiń resmi deregin taldai otyryp, Máskeý men Sankt-Peterbýrgte koronavirýstan qaitys bolǵandar sany resmi kórsetkishten 70 paiyzǵa artyq bolýy múmkin dep habarlaǵan. Resei SIM aqparatty joqqa shyǵarýdy talap etken.
Degenmen Reseidiń densaýlyq saqtaý ministrliginiń túsindirmesine sáikes, eger dárigerler koronavirýs juqqan naýqastyń óliminiń negizgi sebebi basqa aýrý dep tanysa, onda naýqas koronavirýstan qaitys boldy dep sanalmaidy.
