QR syrtqy ister ministri Qairat Ábdirahmanov BJZQ-nyń Ázirbaijan bankindegi investitsiialaryna qatysty pikir bildirdi, - dep habarlaidy "Ult aqparat" kaz.tengrinews.kz portalyna silteme jasap.
"Meniń túsinýimshe, munda másele qiyn jaǵdaida qalǵan Ázirbaijan bankindegi zeinetaqy jinaqtary jaiynda. Biz diplomatiialyq arnalar arqyly Ázirbaijannyń qajetti qurylymdarymen belsendi túrde jumys isteitin bolamyz", - dedi Qairat Ábdirahmanov úkimettegi brifing barysynda.
Osyǵan deiin Ázirbaijan BJZQ-nyń Halyqaralyq bankke salǵan aqshasyn qaitaryp berýge ýáde bergen edi. "Mindetter qaita qurylymdanǵan soń Halyqaralyq bank taza tabyspen jumys isteitin bolady. Sondyqtan endi bankte eshqandai problema bolmaidy. Olarǵa alańdaýdyń qajeti joq. Qazaqstanda negizsiz shý shyǵyp ketti", - degen edi sarapshy Akram Gasanov.
Sondai-aq, sarapshy Rahym Oshaqbev BJZQ-nyń investitsiialaýyna qatysty pikir bildirgen edi. Onyń aitýynsha, BJZQ aktivteriniń 71,3 milliard teńgesi Ázirbaijannyń halyqaralyq bankine salynǵan. "Osylaisha, zeinetaqy aktivteriniń saqtalýyna qatysty úlken qaýipter paida bolýy múmkin", - degen edi sarapshy.
