Qazaqstannyń Eńbek jáne halyqty áleýmettik qorǵaý ministri Birjan Nurymbetovtiń aitýynsha, 2019 jylǵy derek boiynsha Qazaqstanda 394 myń ózbek migranty bar, olar byltyr alǵashqy toǵyz aida ulttyq bankter arqyly Ózbekstanǵa 108 mln dollar aqsha aýdarǵan.
- Qazaqstanda kompaniia, mekemelik uiymdarda 19 myń shetel azamaty isteidi, olardyń 800-i - Ózbekstan azamaty. Buǵan qosa, jeke tulǵalar jumysqa jaldaityn shetel azamattary bar. Olardyń jumysyn tolyǵymen ishki ister ministrligi baqylaidy. Olar ruqsatnama beredi. Daktiloskopiia júrgizedi. Salyqtaryn jinaidy. Ishki ister ministrligiinń málimeti boiynsha, byltyr jumys isteý boiynsha 414 myń ruqsatnama berilgen. 95 paiyzy iaǵni, 394 myńy - Ózbekstan azamattaryna berildi, - deidi Birjan Nurymbetov.
Onyń aitýynsha, ózbek azamattary negizinen úi sharýashylyǵy onyń ishinde, qurylys, páter jóndeý, aspazdyq jumysqa tartylǵan. Byltyr qańtar men qyrkúiek ailary aralyǵynda ózbek migranttary ulttyq bankter arqyly Ózbekstanǵa 108 mln dollar aqsha aýdarsa, Ózbekstandaǵy Qazaqstan azamattary osy ýaqyt arylyǵynda 25 mln dollar aýdarǵan.
19 aqpanda májiliste Qazaqstan men Ózbekstan úkimeti arasynda "migranttardyń qyzmeti men quqyqtaryn qorǵaý týraly kelisimdi ratifikatsiialaý týraly" zań jobasy qaraldy. Ministr zań jobasy talqylanǵan jiynnan keiin jýrnalisterge osyndai derek aitty. Nurymbetovtiń aitýynsha, bul zań jobasynda ózge máselelermen birge eki eldegi migranttardy meditsinalyq kómek, demalyspen qamtamasyz etý siiaqty máseleler qarastyrylǵan.
