Búgin Qazaqstan Respýblikasynyń Mádeniet jáne sport ministri Aqtoty Raiymqulova Serbiia astanasy Belgradta ótken bokstan erler arasyndaǵy XXI álem chempionatynyń jeńimpazdaryn, júldegerlerin jáne Qazaqstan quramasynyń bapkerlerin qabyldady, dep habarlaidy "Ult aqparat".
Ministr óz sózinde Serbiiadaǵy chempionatta Qazaqstan quramasy qol jetkizgen birneshe eleýli oqiǵany atap ótti.
«Qazaqstan egemen el retinde 1993 jyldan beri bokstan álem chempionattaryna úzdiksiz qatysyp keledi. Osy aralyqtaǵy 15 álem chempionatynda bizdiń bylǵary qolǵap sheberleri 51 medaldi qorjynǵa saldy. Onyń 14-i altyn, 15-i kúmis, 22-si qola. Osy básekede biz barlyq júlde sany boiynsha AQSh-tan ozyp, jalpy esepte Kýba men Reseiden keiin úshinshi orynǵa kóterilip otyrmyz. Bul bizdiń bokstan álemdegi jetekshi memlekettiń biri ekenimizdi kórsetedi. Aldaǵy ýaqytta da tynymsyz eńbektiń arqasynda sportshylarymyz osy qarqynymen júlde qoryn molaita beredi dep senemin. Sizder úshin kelesi mejeniń biri – Tashkentte ótetin álem chempionaty bolmaq»,-dedi ministr.
Sonymen qatar Aqtoty Raiymqulova barlyq boksshymyz sharshy alańda baryn salyp judyryqtasqanyn, jarqyn jekpe-jekterimen qalyń jankúierdiń joǵary baǵasyn alǵanyn jetkizdi.
«Sizder osy dúbirli dodada joǵary sheberlikterińizdi pash ettińizder. Ár jekpe-jekte jeńiske degen zor qushtarlyq tanyttyńyzdar. Muny Sizderge qyzý qoldaý kórsetken jankúierler sezedi. Árbir úlken jeńistiń artynda sportshynyń tabandylyǵymen qatar bapkerdiń qajyrly eńbegi turady. Osy tusta bizdiń bapkerler qosynyna erekshe alǵys aitqym keledi. Laiym shákirtterińiz senim údesinen shyǵyp, úmitterińizdi aqtasyn»,-dep aitty ministr.
Kezdesý barysynda Ulttyq quramanyń kapitany Abylaihan Júsipov sóz alyp, chempionatqa tyńǵylyqty daiyndalý úshin jaǵdai jasaǵany úshin ministrlikke, federatsiiaǵa qurama atynan raqmet aitty.
Osydan keiin Mádeniet jáne sport ministri álem chempionatynyń jeńimpazdary men júldegerlerine sporttyq ataqtardy, razriadtardy jáne biliktilik sanattaryn berý normalary men talaptaryna sáikes, Qazaqstan Respýblikasynyń eńbek sińirgen jattyqtyrýshysy jáne Qazaqstan Respýblikasynyń eńbek sińirgen sportshysy ataǵyn oryndaǵan bapkerler men boksshylardy marapattady.
Aita keteiik, eki jylda bir ótetin bokstan álem chempionaty 26 qazan men 6 qarasha aralyǵynda Belgrad qalasynda ótti. Atalǵan chempionatqa álemniń 105 memleketinen 650 sportshy qatysty. Qazaqstan quramasy sapynan 13 sportshy attanyp, qurama 2 altyn, 2 kúmis, 1 qola medal jeńip aldy. Osylaisha, jalpy komandalyq esepte ekinshi orynǵa turaqtady.
