Biyl Qazaqstanda meningit infektsiiasymen 58 naýqas tirkeldi. Bul týraly QR Densaýlyq saqtaý ministri Eljan Birtanov málim etti, dep habarlaidy QazAqparat.
«Jyl basynan beri Qazaqstanda meningit infektsiiasyn juqtyrǵan 58 naýqas tirkeldi. Olardyń 18-i 14 jasqa deiingi balalar. Biyldan bastap atalǵan dertten 12 adam kóz jumdy, sonyń ishinde beseýi 14 jasqa deiingi jetkinshekter», - dedi ministr Ortalyq kommýnikatsiialar qyzmetinde.
Onyń sózine qaraǵanda, meningitke shaldyǵýdyń eń joǵary kórsetishi 2015 jyly tirkeldi, sol kezde 424 oqiǵa anyqtaldy. Sonymen qatar 2016 jyly 120 naýqas, al 2017 jyly 62 naýqas boldy.
«Jyl saiyn aýrýǵa shaldyqqandardyń sany ózgerip turady. 2013 jyly 18 naýqas kóz jumdy, 2014 jyly - 15, 2015 jyly -21, 2016 jyly -7, 2017 jyly - 11, sondai-aq aǵymdaǵy jyly miningitten 12 adamnyń ómiri qiyldy. Jalpy, osy jaǵdai bastalǵanda, eń birinshi naýqas 30 sáýirde tirkeldi. Biz qajetti epidemiologiialyq jáne meditsinalyq kómekti uiymdastyrý jumystaryn barsha óńirler boiynsha qamtydyq. Ótken aptada meniń buiryǵymmen arnaiy respýblikalyq shtab quryldy, sonymen qatar ár oblystyń negizinde óńirlik shtabtar da jasaqtaldy», - dedi Eljan Birtanov.
