QR Energetika ministri Maǵzum Myrzaǵaliev elde benzin baǵasynyń kóterilýine eshqanda negiz joqtyǵyn málim etti, dep habarlaidy QazAqparat.
«Benzinge keletin bolsaq, keshe benzinniń qymbattaǵany týraly aqparat tarady. Men sońǵy úsh jyldaǵy statistikany zerttedim. Sońǵy úsh jylda, iaǵni, 2018 jyldan bastap 2021 jylǵa deiin AI-92 markaly benzinniń baǵasy 163-ten 177-178 teńgege deiin ósken. Úsh jyl ishinde 15 teńgege qymbattaǵan degen sóz. Bul, árine, shamaly ǵana ósý. Degenmen keshegi málimet bizdi alańdatty. Sebebi biz qazir benzin baǵasynyń ósýine negiz joq dep eseptemiz. Sebebi benzin qajetti mólsherde óndirilip, jóneltilip jatyr. Benzinge qatysty jaǵdai, árine, búginde turaqty», - dedi Úkimet otyrysynan keiin jýrnalisterdiń suraqtaryna jaýap bergen Maǵzum Myrzaǵaliev.
Sondai-aq ministr aviakerosin tapshylyǵy týraly suraqqa jaýap berdi.
«Elimizde aviakerosin kólemi boiynsha jaǵdai aitarlyqtai turaqty. Bizde onyń qory 37 myń tonnadan asady. Ai saiyn 50 myń tonna tutynsaq, shamamen 46 myń tonna aviakerosin shyǵarýdy josparlap otyrmyz. Sondyqtan qamtamasyz etýge bailanysty eshqandai másele týyndamaýǵa tiis», - dedi ministr.
Onyń aitýyna qaraǵanda, eldiń janarmai naryǵyndaǵy jaǵdai turaqtana bastaǵan.
«Otyn daǵdarysy jaz ailarynda bastaldy. Munai bazalarynda dizeldiń qory óte kúrt kemi bastaǵan bolatyn. Birinshi qadam Resei Energetika ministrliginiń kezdesýin uiymdastyrý boldy ( ... ) Resei energetika ministri oǵan ún qatyp, bir jarym aidyń ishinde biz dizel otyny boiynsha jaǵdaidy turaqtandyra aldyq», - dep eske aldy vedomstvo basshysy.
Maǵzum Myrzaǵaliev elge syrttan shamamen 190-200 myń tonna dizel ákelingenin atady.
«Bul - jaǵdaidy turaqtandyrý úshin jetkilikti kólem. Árine, baǵa máselesi óte ózekti. Óitkeni, biz munai baǵasynyń óskenin baiqap otyrmyz. Tiisinshe, Resei zaýyttarynda janar-jaǵarmai baǵasy aitarlyqtai kóterilip, biz qymbat dizel importtaýǵa májbúr boldyq. Eń bastysy, jaǵdaidy turaqtandyrýǵa múmkindik aldyq», - dedi Energetika ministri.
