QR Ishki ister ministri Erlan Turǵymbaev Almaty túbinde «Bek Air» ushaǵynyń apatqa ushyraýynyń 3 nusqasyn atady, dep habarlaidy "Ult aqparat".
«Qazirgi ýaqytta oqiǵaǵa qatysty tergeý júrgizilip jatyr. Tergeýge sáikes úsh nusqamyz bar. Birinshisi – ushaq ekipajynyń qateligi. Ekinshi – ushaqtaǵy tehnikalyq aqaý. Úshinshi – áýejaidyń navigatsiialyq qyzmetiniń qateligi. Búginde 5-6 tehnikalyq saraptama júrgizilý ústinde. Ushaqty jasaǵan zaýyttan mamandar keldi. Olar bizdiń sarapshylarmen birlesip jumys istep jatyr. Saraptamalar bitkennen keiin nátijesin aitamyz», - dedi ministr Úkimet otyrysynan keiin BAQ ókilderiniń saýalyna orai.
Onyń aitýynsha, ushaqtyń ekinshi ushqysy, bir bortserik qazirgi ýaqytta aýrýhanada reanimatsiiada jatyr. Al qalǵan 2 bortserik ushaqtyń artqy bóliginde otyrǵandyqtan aman qaldy.
Atap ótsek, qaiǵyly oqiǵa 27 jeltoqsan tańerteń boldy. Bek Air áýe kompaniiasynyń "Almaty – Nur-Sultan" baǵytyndaǵy Fokker 100 ushaǵy Almaty mańyna qulady.
Ushaqta 93 jolaýshy men 5 ekipaj múshesi bolǵan. Apat 12 adamnyń ómirin qidy, qaza bolǵandardyń ishinde ushaq komandiri bar. Ekinshi ushqysh qazir aýrýhanada jansaqtaý bóliminde jatyr.
Prezident tapsyrmasymen Premer-ministr jetekshilik etetin komissiia quryldy. Toqaev apattyń sebebin anyqtap, kinálilerdi qatań jazalaýdy tapsyrdy. 28 jeltoqsan elimizde jalpyulttyq aza tutý kúni bolyp jariialandy.
