Ekologiia, geologiia jáne tabiǵi resýrstar ministri Maǵzum Myrzaǵaliev aýasy joǵary deńgeide lastanǵan 10 qalany atady, dep habarlaidy "Ult aqparat".
«2019 jyldyń qorytyndysy boiynsha atmosferalyq aýanyń ekologiialyq monitoringine sáikes 45 eldi mekenniń ishinde 10 qala atmosferalyq aýanyń joǵary lastaný deńgeiine jatady. Olar: Nur-Sultan, Almaty, Qaraǵandy, Temirtaý, Atyraý, Aqtóbe, Balqash, Óskemen, Jezqazǵan jáne Shymkent. Sonymen qatar, lastaýshy zattar shyǵaryndylarynyń edáýir kólemi Pavlodar oblysyna tiesili», - dedi Maǵzum Myrzaǵaliev Úkimet otyrysynda.
Ministr óńirlerdegi ekologiialyq ahýaldy jaqsartý sharalary jónindegi sózin Almaty qalasynan bastady.
Aitýynsha Almaty qalasynda aýanyń lastanýy JEO-2 men JEO-3 jylý kózderiniń, avtokólikterdiń jáne qalaǵa irgeles Almaty oblysynyń gazdandyrylmaǵan jeke úileriniń shyǵaryndylarymen bailanysty.
«Almaty qalasynyń ekologiialyq jaǵdaiyn jaqsartý úshin daiyndalǵan jol kartasynda 20 is-shara qarastyrylǵan. Onyń ishinde negizgisi - JEO-2 men JEO-3 gazǵa aýystyrý, qalaǵa irgeles jatqan jeke menshik úilerdi gazdandyrý, kommýnaldyq jáne qoǵamdyq avtokólikterin tabiǵi gazǵa kóshirý, dizel otynymen júretin qoǵamdyq kólikke kezeń-kezeńmen tyiym salý, tranzittik kólikterdiń kirýine/júrýine shekteý qoiý jaǵyn qarastyrý jáne kógaldandyrý. Sonymen qatar jel rejimine zertteý júrgizý jáne sony eskere otyryp, sáýlet kelbeti erejelerine ózgerister engizý jáne qurylystyń bas josparyn túzetý bolyp otyr», - dedi ol.
