Ataýly áleýmettik kómek alatyn otbasynyń otaǵasy usynylǵan jumysty istep júrip, keiin áleýmettik shartty buzyp, shyǵyp qalsa, áleýmettik kómekten búkil otbasy qaǵylady. Bul týraly Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy "Ult aqparat".
Eńbek ministri ataýly áleýmettik kómek kórsetýdiń jańa tetikterin túsindirdi. Qoldanystaǵy zań boiynsha, eger otbasynyń eńbekke jaramdy múshesi memleket usynǵan jumystan bas tartsa, onda tek soǵan tiesili ataýly áleýmettik kómek toqtatylatyn. Al otbasynyń qalǵan músheleri ala beredi.
"Sóitip, onyń bári masyldyq degen sózdi ózim jaqsy kórmeimin, biraq azamattardyń jaýapkershiligin tómendetti", - dedi ministr senattyń jalpy otyrysynda.
Endi ministrlik azamattardyń jaýapkershiligin kóterý úshin ataýly áleýmettik kómek kórsetýge qatysty ózgerister engizip otyr. Oǵan sáikes, tabysy tómen otbasy ataýly áleýmettik kómekke ótinish berip, kómek taǵaiyndalǵannan keiin, eńbekke jaramdy múshesine jumys usynylady.
"Eger de jumystan bas tartsa, ataýly áleýmettik kómek búkil otbasyǵa toqtatylady. Eger kelisip, biraq, jumys istep júrip, keiin áleýmettik shartty buzyp, shyǵyp qalsa,onda januiasy áleýmettik kómekten qaǵylady", - dedi Nurymbetov.
Búgin senatta keibir zańnamalyq aktilerge mindetti áleýmettik saqtandyrý, áleýmettik qamsyzdandyrý jáne densaýlyq saqtaý salasyndaǵy memlekettik-jekeshelik áriptestk máseleleri boiynsha ózgerister men tolyqtyrýlar engizý týraly zań jobasy qaraldy.
