QR Mádeniet jáne sport ministri Arystanbek Muhamediuly Astananyń 20 jyldyq mereitoiyna nege osynsha qarajat qarastyrylyp otyrǵanyn túsindirdi, dep habarlaidy Sputnik Qazaqstan tilshisi.
"Bul halyqaralyq tájiribe, sondyqtan biz el bedelin kóteretin sharalardy ótkizýge mindettimiz. Qazaqstan – álemdik qaýymdastyqtyń bir bóligi. Barlyq el halyqty tartý úshin óner arqyly óz jetistikterin kórsetýi tiis. Imidjdik sharalar osy úshin de uiymdastyrylady. Ózderińiz kórip otyrǵandai, biz barlyq sharany iri álemdik teatrlarmen nemese kontserttik uiymdarmen birlesip ótkizip jatyrmyz. Bul qajet", — dedi ministr.
Arystanbek Muhamediuly osy oraida qomaqty qarjyny qajet etip otyrǵan mádeni is-sharany atady.
"15-16 maýsymda Voice of Astana" halyqaralyq estrada ánderi festivalin uiymdastyrýdy josparlap otyrmyz. Mádeni is-sharalardyń ishinde osy festivalge basqalaryna qaraǵanda kóp qarjy jumsalady. Festivaldiń birinshi kúnin Baiǵali Serkebaevtyń 60 jyldyǵyna arnaǵymyz keledi. Ekinshi kúni Batyrhan Shúkenovti eske alý keshi bolady. Onyń dostary Valerii Meladze, Agýtin, Kristina Orbakaite ánshini eske alýǵa arnalǵan kontsertke qatysý bizdiń boryshymyz dep otyr", — dedi ministr.
Sondai-aq, vedomstvo basshysynyń aitýynsha, "Astana Opera" teatry Beijiń ulttyq opera teatrymen birlesip Dj.Pýchchinidiń "Týrandot" operasyn sahnalaidy.
"Bul bizdiń alǵashqy birlesken qoiylymymyz. Beijiń teatrymen birlesken qoiylymǵa qol jetkizý ońai bolǵan joq. Beijiń ulttyq opera teatrynyń shyǵyndaryn óteý boiynsha qytailyq kompaniiamen kelissózder júrgizip jatyrmyz", - dedi ol.
Aita ketsek, Astananyń 20 jyldyǵyna 85 mádeni jáne sporttyq shara josparlanǵan, oǵan biýdjetten 19 mlrd teńge qarastyrylyp otyr.
Sonymen qatar, elordanyń 20 jyldyq mereitoiyna orai "Án men ánshi" shoý kontserti, 1-5 shilde aralyǵynda "Eýraziia" 14-shi halyqaralyq kinofestivali, Amerikan balet teatrynyń gastrolderi, qyrkúiekte "Qurmanǵazy jáne Uly dala mýzykasy" halyqaralyq festivali, qazan aiynda "Shertpe kúi" respýblikalyq festivali men Dj.Rossinidiń "Sevilskii tsiriýlnik" operasynyń premerasy ótedi josparlanǵan.
Buǵan qosa, maýsym-qyrkúiek aralyǵynda "Etnoaýyl" kesheni jumys isteidi. Shilde aiynda halyqaralyq aqyndar aitysyn ótkizý josparlanǵan. Aitysqa Qyrǵyzstan, Túrkiia, Ózbekstan, Eýropa elderi, Resei, Qytai, Mońǵoliia elderiniń aityskerleri qatyspaq. Respýblikalyq aqyndar aitysy jeltoqsanda ótedi.
Sondai-aq, vedomstvo elorda turǵyndary men qonaqtaryn sporttyq sharalarmen de qýantady. Atap ótsek, "Qazaqstan barysy", "Uly dala alamany", "Astana" halyqaralyq marafony, qazaq kúresinen "Álem barysy" halyqaralyq týrniri josparlanyp otyr.
