Búgin Úkimet úiinde ótken baspasóz máslihatynda QR Densaýlyq saqtaý ministri Eljan Birtanov Astanadaǵy №3 perzenthanada bolǵan náresteniń ólimin baqylaýǵa alatynyn jetkizdi, dep habarlaidy Ult.kz tilshisi QazAqparat agenttigine silteme jasap.
«Biz atalǵan oqiǵany baqylaýǵa alamyz. Búginde ondai jaǵdailarǵa bailanysty naqty quqyqtyq tetikter bar. Aldymen arnaiy saraptama ótkizý kerek. Odan keiin ishki ister ministrligi tergeý amaldaryn júrgizedi. Sonyń negizinde sottyń sheshimi shyǵarylady», - dedi Birtanov.
Onyń aitýynsha, aǵymdaǵy jyldyń birinshi toqsanynda elimizde nárestelerdiń ólimi 8,6 protsentti qurady. Ótken jyly atalǵan kórsetkish 10,3 protsent bolǵan.
Aita keteiik, baspasóz máslihaty barysynda jýrnalist Ásel Mámbeldinova 28 sáýir kúni Astanadaǵy 3 perzenthanada bala óliminiń bolǵanyn jetkizdi. «26 sáýirde keshkisin anasy tolǵaqpen sol perzenthanaǵa túsken. Biraq ózdigimen bosana almady. Sol kezde balanyń júrek qaǵysy álsiregen. Dárigerler sony bile tura, bárin tańerteńge deiin qaldyrǵan. Ertesinde aiaq astynan ishin jaryp, balany alyp shyqqan. Alaida onyń ókpesine sý ketip qalǵan. Bir kúnnen keiin bala qaitys boldy. Salmaǵy 4 keli, sap-saý bala edi. Endi ata-analar dárigerlerdi kinálap otyr. Sebebi keshkisin birden kesar tiligi jasalǵanda ondai jaǵdai bolmaityn edi», - deidi jýrnalist.
