بٷگٸن ٷكٸمەت ٷيٸندە ٶتكەن باسپاسٶز مەسليحاتىندا قر دەنساۋلىق ساقتاۋ مينيسترٸ ەلجان بٸرتانوۆ استاناداعى №3 پەرزەنتحانادا بولعان نەرەستەنٸڭ ٶلٸمٸن باقىلاۋعا الاتىنىن جەتكٸزدٸ, دەپ حابارلايدى ۇلت.كز تٸلشٸسٸ قازاقپارات اگەنتتٸگٸنە سٸلتەمە جاساپ.
«بٸز اتالعان وقيعانى باقىلاۋعا الامىز. بٷگٸندە ونداي جاعدايلارعا بايلانىستى ناقتى قۇقىقتىق تەتٸكتەر بار. الدىمەن ارنايى ساراپتاما ٶتكٸزۋ كەرەك. ودان كەيٸن ٸشكٸ ٸستەر مينيسترلٸگٸ تەرگەۋ امالدارىن جٷرگٸزەدٸ. سونىڭ نەگٸزٸندە سوتتىڭ شەشٸمٸ شىعارىلادى», - دەدٸ بٸرتانوۆ.
ونىڭ ايتۋىنشا, اعىمداعى جىلدىڭ بٸرٸنشٸ توقسانىندا ەلٸمٸزدە نەرەستەلەردٸڭ ٶلٸمٸ 8,6 پروتسەنتتٸ قۇرادى. ٶتكەن جىلى اتالعان كٶرسەتكٸش 10,3 پروتسەنت بولعان.
ايتا كەتەيٸك, باسپاسٶز مەسليحاتى بارىسىندا جۋرناليست ەسەل مەمبەلدينوۆا 28 سەۋٸر كٷنٸ استاناداعى 3 پەرزەنتحانادا بالا ٶلٸمٸنٸڭ بولعانىن جەتكٸزدٸ. «26 سەۋٸردە كەشكٸسٸن اناسى تولعاقپەن سول پەرزەنتحاناعا تٷسكەن. بٸراق ٶزدٸگٸمەن بوسانا المادى. سول كەزدە بالانىڭ جٷرەك قاعىسى ەلسٸرەگەن. دەرٸگەرلەر سونى بٸلە تۇرا, بەرٸن تاڭەرتەڭگە دەيٸن قالدىرعان. ەرتەسٸندە اياق استىنان ٸشٸن جارىپ, بالانى الىپ شىققان. الايدا ونىڭ ٶكپەسٸنە سۋ كەتٸپ قالعان. بٸر كٷننەن كەيٸن بالا قايتىس بولدى. سالماعى 4 كەلٸ, ساپ-ساۋ بالا ەدٸ. ەندٸ اتا-انالار دەرٸگەرلەردٸ كٸنەلاپ وتىر. سەبەبٸ كەشكٸسٸن بٸردەن كەسار تٸلٸگٸ جاسالعاندا ونداي جاعداي بولمايتىن ەدٸ», - دەيدٸ جۋرناليست.
