Búgin Parlament Senatynyń jalpy otyrysynda Eńbek jáne halyqty áleýmettik qorǵaý ministri Mádina Ábilqasymova 2018-2020 jylǵa arnalǵan respýblikalyq biýdjetti naqtylaý týraly zań jobasyn talqylaý barysynda áleýmettik salaǵa bólinetin biýdjet qarjysyn azaitý sebebin aitty, dep habarlaidy Baq.kz tilshisi.
Senator Dinar Núketaeva áleýmettik salaǵa bólinetin shyǵystar 5 mlrd 720 mln teńge qysqartylyp otyrǵanyn aitty. Onyń aitýynsha, naqty osy tólemderdi alatyndar sany azaitylǵan jáne ortasha kólemdegi tólemderge bailanysty bala týýǵa tólenetin bir rettik tólemaqy men bir jasqa kelgenge deiingi bala kútimine tólenetin ai saiynǵy qarajat qysqartylǵan.
«Muny qalai túsinýge bolady? Basqa kórshiles memleketterdi alar bolsaq, balanyń týylýyna jyldan-jylǵa qoldaý kórsetip otyr. Onyń kútimine, onyń týylýyna degen qarajatty jyldan-jylǵa kóbeitý arqyly balaly bolýdy úlken mártebege ainaldyryp otyr. Olar qarjyny ulǵaitqanda, biz nege ony qysqartýymyz qajet? Mysaly, Reseide ana kapitaly baryn jaqsy bilesizder. Balaǵa, anaǵa beriletin qarajatty qysqartý arqyly bala sanyn qalai kóbeitemiz jáne demografiiany qalai kóteremiz?» - dep surady senator.
Eńbek jáne halyqty áleýmettik qorǵaý ministri Mádina Ábilqasymova áleýmettik salaǵa bólinetin biýdjet shyǵyndarynyń 5 mlrd 700 mln teńgege azaiý sebepterin atap kórsetti.
«Birinshiden, bir jolǵy bala týýyna arnalǵan járdemaqy men onyń kútimine ai saiynǵy járdemaqy alýshylardyń boljamdy sanynyń azaiýyna bailanysty 2,7 mlrd teńgege qysqartyldy. Josparlaǵan kezde 5 jyl boiy bala týý dinamikasy ósip keldi. Biraq 2017 jyldy alyp qarasaq 19 myń balaǵa azaidy. Biyl osy járdemaqyny alatyn adamdar sany qaitadan azaiady dep kútip otyrmyz. Biylǵy shyǵystardy qarastyrǵanda 5 jyldyń dinamikasyn alǵanbyz, biraq 2017 jyldyń qorytyndysy boiynsha bizdiń boljamymyz ózgerdi», - dedi ol.
Ministr qarjy kólemi qysqarǵanymen járdemaqy sany men mólsheri bir qalypta qalatynyn aitty. Onyń aitýynsha, qazir kóp áiel jumysqa ornalasyp, bala kútýge bailanysty tólemderdi áleýmettik saqtandyrý qorynan alyp jatyr. Al qordan alsa tólem mólsheri úlken bolady.
«Ekinshiden, tórt balaly otbasylarda 1-2-shi balaǵa alǵan tólemderdiń mólsheri azdaý bolady, al 3-4-shi balaǵa úlken bolady. Qazirgi bizdiń boljamymyz boiynsha, 3-4-shi bala týýǵa qatysty tólemder sany kishkene azaidy. Sebebi 1-2 balaly otbasylar sany kóbeidi. Shyǵystardy kishkene qysqarttyq. Biraq ta ólshemi birqalypta qalyp, ósip jatyr», - dedi Ábilqasymova.
