Memleket Basshysy Qasym-Jomart Toqaevtyń Jarlyǵymen jappai tártipsizdik kezinde qyzmettik mindetterin atqarý ústinde qaza tapqan politsiia qyzmetkerleri Darhan Barǵanaev pen Erbol Erjanov «Aibyn» ordenimen marapattaldy. Ishki ister ministri Erlan Turǵymbaev olardyń otbasylaryna memlekettik nagradalardy tabystady, dep habarlaidy "Ult aqparat" Polisia.kz saityna silteme jasap.
«Bizdiń áriptesterimiz, politsiia leitenanty Darhan Barǵanaev jáne ádilet praporshigi Erbol Erjanov ómiriniń sońǵy sátine deiin Otanǵa, halyqqa degen adaldyǵyn abyroimen kórsetti. Olar biz úshin árqashan Otanǵa adal qyzmet etýdiń, erliktiń jáne paryzǵa beriktiktiń úlgisi bolady», – dep atap ótti Erlan Turǵymbaev.
Ol ishki ister organdarynyń qyzmetkerleri qyzmet boryshy boiynsha árdaiym qylmysqa qarsy kúrestiń jáne azamattardyń qaýipsizdigin qamtamasyz etýdiń aldyńǵy qatarynda júretinin atap ótti. Politseilerdiń kúndelikti jumysy ómir men densaýlyqqa qaýip tóndiredi. Qiyn jaǵdailarda qyzmetkerler birneshe sekýnd ishinde jaýapty sheshimder qabyldaýǵa májbúr, keide olardyń keibiri adam ómirimen bailanysty bolyp jatady.
Áskeri jáne qyzmettik boryshyn oryndaý kezinde kórsetken erligi men janqiiarlyǵy, sondai-aq, memleket múddesin qorǵaý kezinde jasaǵan erlikteri úshin Almaty oblysy boiynsha QAJD-niń LA-155/16 mekemesiniń qyzmetkeri Erbol Erjanov III dárejeli “Aibyn” ordenimen, Almaty oblysy PD Jedel qimyldaý arnaiy jasaǵynyń qyzmetkeri Darhan Barǵanaev II dárejeli “Aibyn” ordenimen marapattaldy.
Erbol Erjanov ishki ister organdarynda 1999 jyldan bastap qyzmet atqardy. Ol jas qyzmetkerlerge tálimger boldy jáne eki balany tárbielep otyrǵan kásibi, adal qyzmetker retinde kópke úlgi boldy.
Darhan Barǵanaev IIO júiesinde qyzmetin 2011 jyly bastady. Qyzmet etken jyldary ol óziniń kásibiligin arttyryp, qaýipsizdikti jaqsartýǵa umtyldy.
