QR Densaýlyq saqtaý ministri Aleksei Tsoi áleýmettik jelide keńinen taraǵan Shymkent qalasyndaǵy jekemenshik klinikanyń dárigeri Aina Bakeevanyń koronavirýsty emdeý hattamasyn qaita qarastyrý qajettigi týraly videosyna pikir bildirdi, dep habarlaidy "Ult aqparat".
«Bul video keńinen taralyp jatyr. Jeke klinikanyń dárigeri - terapevt-reabilitolog emdeý jáne asqyný jaǵdailaryna boljam jasai kele azamattarymyzdy em alýdan bas tartýǵa shaqyrady. Bul videoǵa qazirdiń ózinde densaýlyq saqtaý júiesi mamandary árqily pikir aityp, Qazaqstannyń túrli óńirleriniń dárigerleri óz oilaryn ortaǵa saldy. Qazirgi ýaqytta Qazaqstanda qoldanylyp jatqan barlyq klinikalyq hattamalardyń eń aldymen halyqaralyq deńgeide moiyndalǵanyn, naqtylanǵan ádistemelerdiń qoldanysta ekendigin túsiný óte mańyzdy», - dedi ministr Ortalyq kommýnikatsiialar qyzmetindegi brifing barysynda.
Onyń atap ótýinshe, patsienttermen tikelei jumys isteitin dárigerler preparatty qalai jáne qandai mólsherde qoldaný kerektigin, kimde asqyný bar ekenin, kimge preparatty qoldanýǵa bolmaitynyn jaqsy biledi.
«Áriptesterimiz atalǵan dárigermen bailanysyp, sóilesip, dáiekteri men dálelderin tyńdaýǵa, ony ǵylymi qaýymdastyqta talqylaýǵa tyrysqan edi. Ókinishke qarai, oǵan qońyraý shala almadyq. Áriptesterimiz úiine de bardy. Biraq, bailanysa almadyq. Biraq, biz bul jaittardy kez kelgen ýaqytta talqylaýǵa daiynbyz», - dedi Aleksei Tsoi.
