Aqparat jáne qoǵamdyq damý ministri Aida Balaeva halyq aldyndaǵy eseptik kezdesýinde aqparatqa qol jetkizý múmkindikterin keńeitýge baǵyttalǵan sharalardy atady, dep habarlaidy QazAqparat.
«Aqparatqa qol jetkizý máselesine Memleket basshysy óziniń Joldaýynda erekshe nazar aýdarǵany tegin emes. Aqparatqa qol jetkizý týraly zań qabyldanǵan sátten bastap oǵan tujyrymdamalyq ózgerister engizilmegen edi. Osyǵan bailanysty, qajetti túzetýler paketi ázirlendi, oǵan Prezident 2020 jylǵy 30 jeltoqsanda qol qoidy», - degen ministr tujyrymdamalyq túzetýlerdiń basymdyqtaryna toqtaldy.
«Barlyq memlekettik organdarda aqparatqa qol jetkizý máseleleri boiynsha ýákiletti tulǵalar nemese bólimsheler aiqyndaldy. Biyl alǵash ret Memleket basshysynyń aldyna Úkimet aqparatqa qol jetkizý salasynyń jai-kúii týraly esep engiziledi. Aqparat ieleriniń tizimi keńeitildi. Olardyń qataryna ortalyq jáne jergilikti atqarýshy organdardyń fýnktsiialaryn oryndaýshylar jatady. Memlekettik organdarǵa normativtik-quqyqtyq akt jobalary men biýdjettik baǵdarlama jobalaryn jariia talqylaýdyń bastalǵany týraly aqparattyq habarlamalardy internet-resýrsta ornalastyrý jónindegi talap engizildi», - dedi Aqparat jáne qoǵamdyq damý ministri.
