Qazaqstannyń aqparat jáne kommýnikatsiialar ministri Dáýren Abaev kógildir jáne Georgii lentasy týraly pikirin aitty, - dep habarlaidy kaz.tengrinews.kz.
Ministr zamanaýi qazaqstandyqqa kógildir lentany jaqynyraq dep esepteitinin, alaida qandai tústi jolaq taǵatynyn árkim ózi sheshetinin aitty. "Azamattarymyzdyń 99 paiyzy 9 mamyr - Jeńis Kúnin biledi. Osy merekeni barlyǵymyz jaqsy kóremiz ári qurmetteimiz - bul bastysy. Qalǵany, menińshe, saiasattan shyǵyp otyr. Basty ideologiia osy merekeni jaqsy kórip, este saqtaýymyzda jáne jyl saiyn atap ótetinimizde. Jyl saiyn Memleket basshysy Máńgilik alaýǵa gúl qoiyp, ardagerlerdi quttyqtaidy", - dedi ministr "Habar" arnasyndaǵy "Otkrytyi dialog" jobasynyń aiasynda.
Sondai-aq, Dáýren Abaev "Máńgilik polk" aktsiiasyn qoldaitynyn jetkizdi.
"Máńgilik polk marshyna qatysty meniń ustanymym - qoldaimyn, sebebi bul marsh maidanda qaza tapqan ata-babamyzdy nemese Uly Otan soǵysynda qyzmet etkenderdi eske alý, bul mańyzdy", - dedi vedomstvo basshysy.
Dáýren Abaev Georgii jolaǵy men kógildir lentaǵa qatysty jaǵdaiǵa pikirin aitty.
"Bul jaǵdaida biz kimniń ne isteýi kerek ekenin aitpaýymyz kerek. Adamdar birinshi kezekte estelik retinde taǵýy tiis (lentany - Avt.). Zamanaýi qazaqstandyq kógildir lentany jaqyn qabyldaityny belgili, sebebi munyń bizdiń eldiń táýelsizdigine qatysy bar", - dep atap ótti ol.
Ministr Georgii jolaǵynyń 1941-1945 jyldary emes, 2000-jyldardyń basynda ǵana Uly Otan soǵysy simvoly bolǵanyn eske saldy.
"Bul máseleni saiasilandyrýdyń qajeti joq. Eń bastysy - ata-babalarymyzǵa degen qarym-qatynasymyzdy, olarǵa degen mahabbatymyz ben qurmetimizdi saqtaý", - dep málimdedi ministr.
