Mindetti áleýmettik meditsinalyq saqtandyrý qory 2 aidan keiin bastalatyn saqtandyrý reformasyna daiyndyq týraly aityp berdi, dep habarlaidy QazAqparat.
Aita keteiik, mindetti áleýmettik meditsinalyq saqtandyrý júiesiniń engizilýine 2 aiǵa jýyq ýaqyt qaldy. Densaýlyq saqtaý salasyn jaqsartyp, qyzmet sapasyn kóterýge baǵyttalǵan reforma 2020 jyly bastaý alady. Qordyń habarlaýynsha, búginde qazaqstandyqtardyń 93% meditsinalyq saqtandyrý júiesimen qamtamasyz etilgen.
«Mindetti áleýmettik meditsinalyq saqtandyrý júiesindegi eń iri top – jeńildigi bar 15 sanatqa jatatyn azamattar. Bul tizimge balalar, zeinetkerler, sonyń ishinde Uly Otan soǵysy ardagerleri, kópbalaly analar, jumys istemeitin júkti áielder, dekrettik demalystaǵy analar, múgedekter men múgedek bala kútimimen ainalysatyndar, jumyssyz retinde resmi tirkeýge turǵan azamattar, internat tárbielenýshileri, stýdentter, tergeý oqshaýlaǵyshynda otyrǵandar men qylmystyq-túzeý mekemesinde jazasyn ótep jatqandar, jumys istemeitin oralmandar kiredi. Búginde olardyń jalpy sany 10,8 milliondy qurap otyr», - delingen MÁMS qorynyń habarlamasynda.
Al jumys berýshiler saqtandyrý júiesine 2017 jyldyń 1 shildesinde qosyldy. Qazir olar qaramaǵyndaǵy jumyskerler úshin jalaqynyń 1,5% kóleminde aqsha aýdarady. Bolashaqta jarna kólemin arttyrý josparlanǵan: 2020 jyly jumys berýshi – jalaqynyń 2%, 2022 jyly – 3% mólsherinde aýdarym jasaidy.
2017 jyldyń ekinshi jartysynda ózi úshin jarna aýdarǵan jeke kásipkerler eki jyldyq úzilisten keiin júiege qaita qosylady. Olar keler jyldan bastap eń tómengi jalaqynyń 5% qorǵa aýdarady. Iaǵni, ai saiynǵy tólem - 2 975 teńge.
Sonymen birge, Qazaqstanda ózin-ózi jumyspen qamtyǵan 1 milionǵa jýyq azamat turady. Resmi tirkelmegen, jeke jáne zańdy tulǵalarǵa qyzmet kórsetetin bul toptaǵy azamattar saqtandyrý júiesine eki túrli tásilmen qatysa alady. Birinshisi - eń tómengi jalaqynyń (ETJ) 5% nemese 2 125 teńge. Ekinshisi - salyq organdaryna baryp, biryńǵai jiyntyq tólem (BJT) tóleýshi retinde tirkelý. Qala turǵydary 1 ailyq eseptik kórsetkish (AEK) nemese 2 651 teńge, aýyl turǵyndary – 0,5 AEK nemese 1 326 teńge tóleidi.
Densaýlyq saqtaý ministrliginiń habarlaýynsha, 2020 jyly saqtandyrylǵan turǵyndarǵa meditsinalyq kómek kórsetýge 83,1 myń teńge jumsalmaq. Nátijesinde azamattardyń densaýlyqqa jumsaityn jeke shyǵyndary aitarlyqtai qysqarady.
«Áleýmettik meditsinalyq saqtandyrý qory» KEAQ Almaty filialynyń direktory Tileýhan Ábildaevtyń aitýynsha, MÁMS meditsinalyq kómektiń qoljetimdiligin arttyrýǵa múmkindik beredi. Atap aitqanda, konsýltativtik-diagnostikalyq kómekke bólinetin qarajat - 5 ese, naýqasty ońaltýǵa ketetin shyǵyn - 9 ese artady.
«Qazaqstanda turatyn ár azamat MÁMS júiesine qatysýdy oilastyra bastaýy tiis. Sebebi, ai saiyn az ǵana jarna tólep, qajet bolǵanda meditsinalyq qyzmettiń qymbat, kópshiliktiń qaltasy kótere bermeitin túrlerin paidalana alady. Onyń quny tóleýshiniń 1 jyl boiy aýdarǵan somasynan birneshe ese asyp túsýi múmkin. Mysaly, qazirdiń ózinde bir ret kompiýterlik tomografiia jasatýǵa 15 myń teńge tóleý qajet», - deidi Tileýhan Ábildaev.
Mindetti áleýmettik meditsinalyq saqtandyrý paketinde turǵyndarǵa konsýltativti-diagnostikalyq kómek, ambýlatoriialyq dárilik qamtamasyz etý, statsionarlyq kómek, ońaltý jáne qalpyna kelý emderi qoljetimdi bolmaq.
