QR Premer-Ministriniń orynbasary Berdibek Saparbaev Mindetti áleýmettik meditsinalyq saqtandyrýdy engizý jumystary jóninde aityp berdi, dep habarlaidy "Ult aqparat".
«Árbir memlekettiń, ulttyń bolashaǵy birden-bir sol memlekettiń azamattarynyń bilimine, densaýlyǵyna, mádenietine, tárbiesine bailanysty. Osy 28 jyl ishinde Qazaqstanda densaýlyq salasyna qandai kóńil bólingenin ózderińiz kúndelikti ómirden jaqsy bilesizder. Onyń eń bir negizgi aiǵaǵy - qazirgi ýaqytta qazaqstandyqtardyń ómir súrý uzaqtyǵynyń 75 jasqa jetkeni. Bul úlken kórsetkish. 28 jyl ishinde bul merzim orta eseppen 10 jylǵa ósti. Osynyń bári memlekettiń júrgizgen saiasatynyń, osy salaǵa qoldaýynyń nátijesi», - dedi B. Saparbaev «MÁMS: qazaqstandyq meditsinanyń jańǵyrýy» forýmynda.
Onyń aitýynsha, qazaqstandyq dárigerlerdiń halyqaralyq bedeli bar jáne ózge memleketterdiń azamattaryna da meditsinalyq kómek kórsetip júr. Meditsinalyq qyzmet sapasyn jaqsarta túsý úshin kelesi jyly elimizde mindetti áleýmettik meditsinalyq saqtandyrý júiesi engiziledi.
«Biz Qazaqstannyń barlyq óńirin aralap, turǵyndarǵa MÁMS júiesiniń artyqshylyqtaryn túsindirdik. 99% daiyndyq bar dep aitýǵa bolady. Biz úshin eń bastysy meditsinalyq qyzmet alatyn turǵyndardyń tirkeýge turýy jáne sanaty. MÁMS boiynsha memleket esebinen turǵyndardyń 15 sanaty (10 mln adam) tegin qyzmet ala alady. Qalǵan 8 mln halyq óz esebinen nemese jumys berýshiler tarapynan qamatmasyz etiledi. Ázirge jergilikti atqarý organdarymen barlyq jumysty bitirdik», - dedi vitse-priemer.
Qaraǵandy oblysynda júrgizilgen pilottyq jobanyń jaqsy nátije kórsetkenin jetkizdi. Bir adamǵa jumsalatyn shyǵyn shamamen 2,5 esege jaqsarǵan. Kóptegen adamdar kompiýterlik tomografiia men MRT ótý múmkindigin alǵan.
«Bul jumystardy jalǵastyramyz jáne qarjylandyrý boiynsha esh kedergi, esh qiyndyq bolmaitynyn aitqym keledi. Jalpy elimizdiń densaýlyq saqtaý júiesi úshin shamamen 1,5 trln teńge bólnedi. Qazir Áleýmettik meditsinalyq saqtandyrý qorynda 270 mlrd teńge bar. Jyl saiyn jumys berýshiler men ózin-ózi jumyspen qamtyǵandar arqyly 500-700 mlrd teńge jinaý kerek. Bul densaýlyq saqtaý júiesine qosymsha qarjy kózi bolady», - dedi Berdibek Sapabaev.
