Qarjylyq monitoring agenttigi Áleýmettik meditsinalyq saqtandyrý qorynan (MÁMS) zańsyz qarjy alý úshin uiymdastyrylǵan aýqymdy alaiaqtyq shemalardy áshkereledi. Tergeý barysynda shamamen 140 myń azamattyń meditsinalyq uiymdarǵa jalǵan tirkelgeni jáne kórsetilmegen meditsinalyq qyzmetter týraly jalǵan málimetterdiń engizilgeni anyqtalǵan, dep habarlaidy ult.kz.
Atalǵan faktiler boiynsha 36 qylmystyq is tergelip jatyr. Aldyn ala esepke sáikes, memleketke keltirilgen shyǵyn 3,5 milliard teńgeden asady.
Túrkistan oblysynda Jetisai kópsalaly aýdandyq aýrýhanasynyń laýazymdy tulǵalaryna qatysty tergeý júrgizilýde. Tergeý málimetinshe, MÁMS aiasynda bólingen qarajat is júzinde eshqandai qyzmet kórsetpegen ári taýar jetkizbegen 20-dan astam jeke kásipkerdiń esepshottaryna aýdarylǵan.
Anyqtalǵandai, kásipkerlerdiń meditsinalyq mekememen eshqandai kelisimsharty bolmaǵan. Olardyń banktik derektemeleri aqshany zańsyz shyǵaryp, keiin qolma-qol aqshaǵa ainaldyrý úshin paidalanylǵan. Bul is boiynsha memleketke keltirilgen shyǵyn 501 million teńgeden asyp, eki kúdikti qamaýǵa alyndy.
Al Astanada «Forte Clinic» jeke klinikasynyń basshysy MÁMS qorynan zańsyz qarjy alý shemasyn uiymdastyrǵany úshin 5 jylǵa bas bostandyǵynan aiyryldy. Onyń sybailasy – Densaýlyq saqtaýdy damytýdyń ulttyq ǵylymi ortalyǵynyń qyzmetkeri azamattardy klinikaǵa zańsyz tirkeýge qatysty ótinimderdi maquldaǵany úshin 3 jylǵa sottaldy.
Tergeý barysynda klinikaǵa 15 myńnan astam azamattyń zańsyz tirkelgeni anyqtaldy. Sondai-aq «Damu Med» aqparattyq júiesi arqyly 79 million teńgeniń jalǵan meditsinalyq qyzmeti rásimdelgen.
Almaty oblysynda «Mydental.kz» jáne «Stomatologiia Dr. Nurzhanova» klinikalarynyń basshysy stomatologiialyq qyzmet kórsetý kezinde alaiaqtyq jasaǵany úshin 4 jylǵa bas bostandyǵynan aiyrylyp, onyń múlki tárkilendi.
Tergeý málimetinshe, patsientterge is júzinde eshqandai qyzmet kórsetilmegen. Jalǵan qujattardy rásimdeý úshin dárigerlerdiń tirkelgi jazbalary men kámeletke tolmaǵan patsientterdiń jeke derekteri paidalanylǵan. Nátijesinde 4,5 myńnan astam jalǵan meditsinalyq qyzmet kórsetý faktisi anyqtalyp, memleketke 66 million teńge shyǵyn keltirilgen.
Qarjylyq monitoring agenttigi bul baǵyttaǵy tergeý jáne zańsyz shemalardy anyqtaý jumystary jalǵasyp jatqanyn málimdedi.
