Foto: kommersant.ru
Qazaqstandyq milliarder Keńes Raqyshev Máskeý mańyndaǵy aýmaǵy 841 sharshy metr úiin satýǵa qoidy. Bul týraly Telegram-daǵy "Vyhod k moriý" arnasy jazdy, dep habarlaidy Azattyq radiosy.
Reseilik jyljymaityn múlik agenttigi shyǵarǵan habarlama qazir ashylmai tur. Alaida agenttik ókili bul úi áli satylymda ekenin aitqan.
"Habarlama saittan múlik iesiniń ótinishimen alyp tastaldy. Biraq úi satylady degen sheshim ózgergen joq" dedi ózin Mihail Býrykin dep tanystyrǵan NF Group jyljymaityn múlik agenttiginiń qyzmetkeri. Onyń aitýynsha, úidiń qunyna ishindegi jihaz ben tehnika baǵasy da kiredi.
69 sotyq jerde ornalasqan ekiqabatty kottedjdiń bastapqy baǵasy 850 million rýbl bolǵan, qazir 670 million rýblge (shamamen 4 mlrd teńge) túsken.
Úi Máskeýdegi eń qymbat aýdanda – Rýblevo-Ýspenskoe kúrejolynda ornalasqan. Jyljymaityn múlik agenttiginiń habarlamasy boiynsha, onda úsh jatyn bólme, birneshe zal, aýmaǵy 234 sharshy metr monsha, úsh avtokólik syiatyn garaj ben qyzmetkerge arnalǵan bir bólmeli úi bar.
Agenttik ókili úi iesi qazir Reseide turmaitynyn, sol úshin satqysy keletinin aitty.
Dál osy úidiń qazaqstandyq milliarder Keńes Raqyshevqa tiesili ekenin úsh jyl buryn reseilik "Proekt" basylymy jazǵan. Basylym Rýblevo-Ýspenskoe kúrejoly Máskeýdegi eń qymbat jer ekenin jazyp, onda ornalasqan jyljymaityn múliktiń kóbine Resei biligine qatysy bar bailar men sheneýnikter ielik etetinin zerttegen. Olar ázirlegen kartaǵa qarasaq, Raqyshevpen bir kóshede orys-ózbek oligarhy Álisher Osmanovtyń týǵan ápkesi Gúlbahor Ismailova turady. Ol da úiin satylymǵa shyǵarǵan.
Azattyq byltyr Raqyshev pen onyń áieli Ásel Tasmaǵambetovanyń Almatydaǵy saraiyn anyqtaǵan. Záýlim úi buryn Qazaqstan kompartiiasynyń demalys úii bolyp, keiin jekeshelendirilgen Almaly qalashyǵynda ornalasqan. Saraidyń qasynda Nursultan Nazarbaevtyń "Elbasy qoryna" qaraityn rezidentsiia, tikushaq qonatyn alań bar.
