Ózbekstan, Resei bilim ministrlikteri jáne Álisher Ýsmanovtyń "Óner, ǵylym jáne sport" qaiyrymdylyq qory Ózbekstanda orys tilin oqytý sapasyn jetildirýge baǵyttalǵan "Klass!" baǵdarlamasyn júzege asyrý týraly memorandýmǵa qol qoidy. Azattyqtyń Ózbek qyzmetiniń habarlaýynsha, Resei taraby qujatqa qol qoiý úshin Tashkentke 11 qazanda kelgen.
Jobanyń alǵashqy kezeńinde 32 reseilik ádisker maman Ózbekstanǵa kelip, eldegi orys tili oqytýshylary men oqýshylardyń tildi meńgerý deńgeiin zerttegen.
Jyl sońyna taman taǵy 100 reseilik maman keledi dep aitylady. Jobaǵa sáikes, osylaisha jyl saiyn Reseiden 100 maman kelip otyrady.
Memorandýmǵa qol qoiý rásimi kezinde Álisher Ýsmanovtyń videomálimdemesi de kórsetilgen.
"Ózim mektepti orys tilinde bitirgendikten tarihi otanymda Ózbekstan men Resei úkimetiniń orys tildi oqytý boiynsha osyndai uzaqmerzimdi ári strategiialyq bastamasyn qoldaǵanyma qýanyshtymyn. Bul bastama sátti júzege asady jáne Ózbekstan halqy arasynda suranysqa ie bolady dep oilaimyn" dedi Ýsmanov.
6 qazanda Ózbekstan bilim ministri Sherzod Shermatov ózbek mektepterinde orys tili ǵana emes, aǵylshyn tilin oqytýǵa da erekshe kóńil bólinedi dep aitqan.
Álisher Ýsmanov – USM Holdings kompaniiasy men "Kommersant" baspa úiiniń negizgi aktsioneri. Forbes jýrnalynyń Reseidegi eń bai kásipkerler tiziminde Ýsmanov jetinshi orynda tur. 2015-2019 jyldary ol qaiyrymdylyq maqsatyna 1,3 milliard dollar jumsaǵan, onyń 400 million dollary 2019 jyldyń úlesinde.
2018 jyldyń basynda AQSh qarjy ministrligi Álisher Ýsmanovqa qarsy jeke ekonomikalyq sanktsiia saldy. Ony Reseidegi Kremlmen bailanysy bar, saiasi bedeli eń joǵary oligarhtardyń biri dep atady. AQSh qarjy ministrligi sondai-aq Ýsmanovtyń menshigine Reseidiń birqatar beldi basylymdary kiredi dep atap ótken. New York Times, Guardian jáne tergeý jýrnalisteri konsortsiýmynyń zertteýinshe, Álisher Ýsmanov Facebook jelisine 200 million dollar qarajat quiǵan.
