10 aqpan - aitys pen jazba poeziiany qustyń qos qanatyndai qatyr alyp, alash jurtyn jyrǵa bólegen aqyn Esenqul Jaqypbek týǵan kúni. «Bizdiń eldiń jigitteri – jigitterdiń tóresi» dep jyrlaǵan aqtańger aqyn 2013 jyly dúnieden ótken bolatyn. Áitkenmen, Esenqul aqynnyń óleń-jyry qazaq eliniń aspanynda áli kún halyqtap tur. Keshe ǵana Esaǵańnyń ónerdegi inisi Meirambek Bespaev Instagram-daǵy jeke paraqshasynda estelik jazbasyn jariialady.
Ómiri ótti...
...Men Esaǵamdy bala kezden bilýshi edim. Shorabek, Ázimbek aǵalarmen aitysyp júrgen kezderinde, men dombyramdy arqalap baryp án salyp, sol kezdegi aitystyń ýytty ázilderin jattap alatynmyn. Ýaqyt óte kele aǵammen jaqyn aralaspasam da, jaqsy kórip, qurmettep, óleńderin oqyp, ánderin tyńdap júretinmin. Sodan maǵan Esenqul aǵammen júzdesýdiń sáti tústi.
Bizdi tanystyrǵan, tabystyrǵan aǵamnyń «Ómir ótti...» atty óleńi edi. Bul óleńge án jazylyp, meniń aitýym - bir Allanyń qalaýy dep bilemin. Áitpese ol ánge talasqan biraz ánshiler boldy. Biraq ol án maǵan buiyrdy. Osy óleńge án jazyp, jasatyp, kórgennen soń ishindegi biraz jerine Esaǵama túzetý engizip berýin ótinip, habarlastym. Esenqul aǵam meniń bul usynysymdy qup kórip, Almatyda kezdeseiik dedi. Almatyda kezdesip, shái ústinde otyryp ol kisi «Eski dospen kezdeskende, Esim shyǵyp, shyn qýanyp... Qairan ómir sonsha súigen, Ketesiń-aý, bir kúni aýyp...» degen joldaryn shyǵaryp berdi.
Biraz ýaqyt ótkennen keiin Esaǵamnyń Almaty qalasynda M.Áýezov atyndaǵy drama teatrynda «Kúpáike kigen poeziia» degen atpen shyǵarmashylyq keshi ótti. Sol keshte men «Ómir ótti zyrǵyp aǵyp» óleńin aityp berdim. Bul óleń sátti shyqty dep oilaimyn. Halyq jaqsy qabyldady. Esaǵam da máz bolyp, betimnen súiip, baýyryna basyp alǵysyn aitty. Sol keshke daiyndalyp júrgende men aǵama aitystarynan úzindi aityp, óleńderin oqyp bergenimde Esaǵam qýanyp: «Meirambek, sen tek ánshi ǵana emes, aqyn ekensiń. Sen meniń biraz óleńimdi bilgenińe shyn qýanyp otyrmyn!», - dep biraz ótken-ketken kúnderden estelikterin aityp, arqa-jarqa bolyp qaitqan edik.
Sol keshti ótkizgen soń men Esaǵammen ýaqyttyń tyǵyzdyǵyna bailanysty kóp kezdese almai júrdim. Keiinnen 31 arnada «Aitylmaǵan áńgime» baǵdarlamasynda aǵamyzdyń 60 jyldyǵyna orai úlken baǵdarlama túsirildi. Stýdiiaǵa baryp «Ómir ótti...» ánin oryndap, Esaǵamyz týraly azdy-kópti biletin oqiǵalardy aityp berdim. Sol kezde de aǵam máz bolyp, qushaqtap, mańdaiymnan iiskep ákelik alǵysyn aityp, batasyn berdi. Sol kún meniń Esaǵammen kezdesetin sońǵy kún ekenin kim bilgen...
Meirambek Bespaev
.jpg)