Ánshi Meirambek Besbaev "Kólsai" ulttyq saiabaǵynyń aýmaǵynda gidti soqqy jyqty dep aiyptalǵan ánshi Tóreǵali Tóreálige qoldaý bildirdi. Ol Instagram paraqshasynda kópshilikten ónerdegi inisine keshirimmen qaraýdy surady.
Óner iesiniń aitýynsha, Tóreǵali Tóráli men aryzdanýshy azamat tatýlasqan.
"Tóreǵalidiń búgingi jaǵdaiyn oilasam: "Qolymda bir qamshym bar sálińgirdei, Atandym elge tentek kádimgidei. Bir tentek el ishinde júrmei me eken, Sońyma nege tústiń báriń birdei?", - degen Amanǵali Seriniń óleń joldary eriksiz eske túse beredi.
Tóreǵali inimniń basy daýǵa ilikkeli árkim jaǵdaidy san saqqa júgirtip jatyr. Kóre almaityndar "saýap boldy" dep kúndese, jaqsy biletinder "jańylǵany shyǵar" dep demeý bolyp jatyr. Bas jarylyp, kóz shyqqan dáneńe joq. "Er shekispei, bekispeidi" degen de bar bul qazaqta. Eki jigit shekisip qalyp, endi qol alysyp, qushaqtasyp jatsa, dostyqqa qarai qadam bassa, bul bárimizdiń utqanymyz emes pe! Shekisken eki jaq bitimge kelipti. Oǵan quqyq qorǵaý organdary da qarsy bolmas dep oilaimyn. Óz balalaryńdy ózeginen tebem deseńizder erikterińiz bilsin.
Tólegen Aibergenovtiń "Qisyqtyǵyn ózgeniń, túzý turyp dálelde" degen joldaryn eske alsaq, eń áýeli bárimizdiń boiymyzda bar óz minimizden uialar ek. Tóresh óz minezin igere almapty, durys emes. Biraq kim bizge óz jaqsysyn ákep beredi deisiz?! Jigitke tán shalt minez, jasyndai jarq etken emotsiiamen eki azamat birin-biri renjitkeni ras. Degenmen arty jaqsylyqpen aiaqtalyp otyr. Bul da mámilege asyǵatyn, jaý bolǵansha baýyr bolýǵa umtylatyn ózimizdiń qazaqi bolmysymyz emes pe! Endi biz de eldigimizge jaraspaityn usaq-túiek ósekti toqtatyp, kerisinshe el ishi daýdan, syrty jaýdan aman bolsyn dep tileiik", - dep jazdy Meirambek Besbaev.
Aita keteiik, ánshi jazbaǵa pikir qaldyrý múmkindigin óshirip qoiǵan.
Eske sala ketsek, buǵan deiin Tóreǵali Tóreáli "Kólsai kólderi" tabiǵi parkinde jas jigitti soqqyǵa jyqty dep aiyptalǵan bolatyn. Keiin bul jait boiynsha qylmystyq is qozǵalǵany belgili boldy. 30 qyrkúiekte ánshiniń ustalyp, ýaqytsha ustaý izoliatoryna qamalǵany habarlandy. Al birneshe kún buryn Tóreǵali Tóreáliniń tergeý izoliatorynan kepildikpen bosatylatyny belgili boldy.
