Elorda, Almaty, Jambyl oblysyndaǵy meshittiń barlyǵynda zalalsyzdandyrý jumystary júrgizilip, meshit ishine meditsinalyq tazartqysh suiyqtyqtar ornatyldy. Bul týraly Qazaqstan musylmandary dini basqarmasynyń baspasóz qyzmeti habarlady.
"Aldaǵy kezde jumanyń ýaǵyzy ýaqytsha toqtaidy. Namaz ýaqyty kirisimen, juma namazy oqylady. Meshitke baliǵat jasyna tolmaǵan balamen kelýge tyiym salynady, sondai-aq, qariialarǵa, áielder men naýqas jandarǵa jamaǵat namazyna qatysýǵa bolmaidy", - dedi Almaty ortalyq meshitiniń baspasóz hatshysy Baýyrjan Myrzaqul.
Sonymen qatar meshitke kirýge birneshe ózgeris engizildi. Dini basqarma ókilderi meshitke kelýshilerdi meditsinalyq betperde taǵyp kelýge jáne namazdan tys meshitte toptasyp turmaýǵa shaqyrdy. Sondai-aq, meshitke úiden dáret alyp kelý kerek. Alaida bul ózgeris meshittiń jumys ýaqytyna áser etpeidi.
"Juma namazdyń ýaqyty qysqartyldy. Alaida "bes ýaqyt namaz oqýǵa kelme", "namaz oqýǵa kelme" degen joq. Meshit burynǵysha jumys istep tur", - dedi Myrzaqul.
Koronavirýstyń kópshilik arasynda taralýynyń aldyn alý maqsatynda juma namazyna bailanysty tómendegidei ózgerister engizildi:
-
2020 jyldyń 20 naýryzynan bastap juma namazynan buryn aitylatyn 30 minýttyq ýaǵyz ýaqytsha toqtatylady;
-
Namaz ýaqyty kire sala azan aitylady, 4 rakaǵat súnnet ótelip, juma namazynyń 2 rakaǵat paryzy qysqa súremen oqylady;
-
Juma namazynyń paryzynan keiin oqylatyn 4 rákaǵat súnnet úide oqylady;
-
Namazdan keiin tásbih tartylmaidy, Quran oqylmaidy, imam qysqa duǵa jasaidy;
-
Namazdan keiin jamaǵat qol berip "Juma qabyl bolsyn" dep amandasýǵa bolmaidy;
-
Meshitke meditsinalyq betperde kiip kelý kerek;
-
Namazdan keiin kóp kidirmei meshitten shyǵý qajet;
-
Juma namazǵa baliǵatqa tolmaǵan balalardy alyp kelýge bolmaidy;
-
Juma namazyna densaýlyǵy jaramaityn qariialar, naýqastar men áielderdiń qatyspaǵany abzal;
-
Aýa raiy qolaily aimaqtarda juma namazyn meshit aýlasynda oqýǵa ruqsat.
Sonymen qatar Qazaqstan musylmandary dini basqarmasy koronavirýstyń aldyn alý sharalaryna kiristi. Elorda, Almaty, Jambyl oblysyndaǵy meshittiń barlyǵynda zalalsyzdandyrý jumystary júrgizilip, meshit ishine meditsinalyq tazartqysh suiyqtyqtar ornatyldy. Sondai-aq, meshitke kelýshilerge tazalyq sharalary tanystyrlyp jatyr.
Aita keteiik, Qazaqstanda 16 naýryzdan bastap tótenshe jaǵdai rejimi engizildi. Ol 15 sáýirge deiin sozylady. Memlekettik komissiia qurylyp, premer-ministr Asqar Maminniń tóraǵalyǵymen jumys isteidi. Prezident tiisti jarlyqqa qol qoidy.
15 naýryzdaǵy málimet boiynsha Qazaqstanda toǵyz adam koronavirýs juqtyrdy. Elde oiyn-saýyq, sport jáne basqa da buqaralyq is-sharalardy, sondai-aq, otbasylyq, salt-dástúr is-sharalaryn ótkizýge tyiym salyndy.
