Merzimdi áskeri qyzmetshiler Arys qalasy poligonyndaǵy jumysqa tartylmaidy. Qorǵanys ministri Nurlan Ermekbaev Úkimet otyrysynan keiin tilshilerge bergen suhbatynda osylai dedi, dep habarlaidy "Ult aqparat".
«Joǵarǵy Bas Qolbasshynyń bizge bergen tapsyrmasy bar. Oq-dárilerdi tezirek alyp shyǵý maqsatyndaǵy memlekettik qajettilik, Arys qalasy turǵyndarynyń talaptary barshylyq. Biz bul baǵytta jumys júrgizip jatyrmyz», - dedi Nurlan Ermekbaev.
Onyń aitýynsha, qazirgi ýaqytta Arystaǵy jaǵdaidy retke keltirý úshin 700 áskeri qyzmetshi jumyldyrylǵan.
«Biz ol jaqqa merzimdi áskeri qyzmetshilerdi tartpaimyz. Onda biliktiligi joǵary, daiyndalǵan saperler, injenerler men áskeri politseiler ǵana barady. Barlyǵy da - kelisimshart boiynsha qyzmettegiler», - dedi ol.
Sonymen birge ministr qalany oq-dáriden tazartý jumystaryn tek mamandanǵan áskeriler júrgize alatynyn málim etti.
«Bul álbette, qaýipti jumys. Arys qalasynyń tynyshtyǵyn saqtap, tapsyrmany oryndaý úshin áskeri qyzmetshiler sanaly túrde táýekelge baryp júr. Áskeri qyzmetshilerden basqa eshkim bul jumysty atqara almaidy. Bul úshin, taǵy da aita keteiin, daiyndyǵy myǵym áskeri mamandar tartylǵan. Dál qazirgi ýaqytta qala turǵyndaryna tikelei qaýip joq. Qala tolyǵymen tazartylǵan. Negizgi jumys jarylys bolǵan áskeri bólim aýmaǵynda júrgizilýde», - dedi ol.
Eske sala ketsek, buǵan deiin Qorǵanys ministri Nurlan Ermekbaev Arys mańynda jarylystan qaza tapqan áskeri qyzmetshiniń týǵan-týystaryna kóńil aitqan bolatyn.
