Ánshi Merýert Túsipbaeva áleýmettik jelidegi paraqshasynda jýrnalist ári Májilistiń burynǵy depýtaty Maqsat Tolyqbaidyń Parlamenttegi qyzmetine kóńili tolmaitynyn ashyq jazdy, dep habarlaidy ult.kz.
Óner iesi onyń depýtat retinde qandai mańyzdy máseleler kótergenin surap, halyqtyń senimin aqtai aldy ma degen saýal tastady. Sondai-aq Aqtaýdaǵy aýyzsý máselesin mysalǵa keltirip, halyqtyń túitkilderin sheshýge nege belsendi aralaspaǵanyn synǵa aldy.
«Maqsat kezinde jaqsy tamada edi. Sol kezde óz ornynda boldy. Eger eskertkish qoiylýy kerek bolsa, keshe ǵana 80 jyldyǵy atalyp ótken tuńǵysh ǵaryshker Toqtar Áýbákirovke qoiylsyn. Maqsat pen Rinat qandai másele kóterdi? Halyqtyń joǵyn joqtady ma? Nege únsiz otyrdy? Halyqtyń senimin aqtady ma?» – dep jazdy ánshi.
Sonymen qatar ol blogerler men óner adamdarynyń saiasattaǵy róline qatysty da pikir bildirip, jazbasyn: «Aitpaqshy, Maqsat – jaqsy tamada! Usynamyn» degen mysqyldy sózben aiaqtady.
Aita keteiik, buǵan deiin Maqsat Tolyqbai «MýzART» tobyna eskertkish ornatýdy jáne qala kósheleriniń birine toptyń atyn berýdi usynǵan bolatyn. Al Merýert Túsipbaeva bul synynyń «MýzART» ujymyna esh qatysy joq ekenin erekshe atap ótti.
