Jambyl oblysynyń Merki aýdanynda 19 jasynda kóz jumǵan Madina Rashidqyzynyń ólimine qatysty jańa derekter aityldy, dep habarlaidy ult.kz.
Jýrnalist Jan Ahmadiev marqumnyń qaiyn jurtyna baryp, jaǵdaidyń mán-jaiyn anyqtaýǵa tyrysqan. Alaida Madinanyń enesi jýrnalistke suhbat berýden bas tartqan. Al jas kelinshektiń kúieýi de úiinen tabylmaǵan.
Jýrnalistiń aitýynsha, marqumnyń kiimderi men jeke zattaryn da týystary bermegen.
Aita keteiik, 19 jastaǵy Madina Rashidqyzynyń artynda segiz ailyq sábii qalǵan. Aqparatqa sáikes, jas kelinshek Ózbekstan azamaty bolǵan, al kúieýi Qazaqstan azamaty. Erli-zaiyptynyń shańyraq kótergenine shamamen eki jyl bolǵan.
Qaiǵyly oqiǵadan bir kún buryn Madina jaqyn qurbysyna kúieýimen arada janjal bolǵanyn aityp, ajyrasqysy keletinin jetkizgen. Sondai-aq qurbysynan 15 myń teńge qaryz suraǵan. Alaida qurbysy qajetti qarajatty taýyp bere almaǵan.
Kelesi kúni Madinanyń qaitys bolǵany belgili bolǵan.
Áleýmettik jelidegi málimetterde jas kelinshektiń buǵan deiin de otbasyndaǵy janjaldar týraly qurbysyna aityp júrgeni jazyldy. Kei derekterde kúieýiniń Madinaǵa qol kótergeni de aitylǵan. Degenmen bul aqparat ázirge resmi túrde rastalǵan joq.
Qazir Madinanyń ólimine qatysty tergeý júrip jatyr. Quzyrly organdar oqiǵanyń naqty mán-jaiy men jas kelinshektiń óliminiń sebebin anyqtaýda.
