Germaniia kantsleri Angela Merkel jáne syrtqy ister ministri Haiko Maas Resei biligin oppozitsiialyq saiasatker Aleksei Navalnyiǵa ý bergenderdi taýyp, jaýapkershilikke tartýǵa shaqyrdy. Dúisenbi kúni Merkel men Maastyń ortaq málimdemesinde osylai dep jazylǵan.
24 tamyzda Navalnyidy emdep jatqan Berlindegi “Sharite” aýrýhanasy saiasatkerdiń aǵzasynan ingibitor holinesteraz tobyna jatatyn ýly zattar tabylǵanyn habarlaǵan bolatyn.
Bul topqa “Novichok” ýy da kiredi, 2018 jyly Sergei Skripal men qyzy Iýliia Skripal da dál osy zattan ýlanǵan edi.
“Navalnyi myrzanyń Resei oppozitsiiasyndaǵy jetekshi rólin eskere otyryp, bilikten osy qylmysty muqiiat ári ashyq zertteý talap etilip jatyr” delingen málimdemede.
Germaniia basshylary málimdemede sonymen birge Navalnyi tolyq jazylatyn shyǵar dep úmittenetinin de jetkizgen. Klinikanyń málimdemesinde onyń ómirine qatty qaýip tónip turmaǵany, biraq saiasatkerdiń esin áli jimaǵany týraly jazylǵan. Dárigerler ýdyń uzaq ýaqyt áser etýi múmkin ekenin de joqqa shyǵarmaǵan.
Resei biligi “Sharite” klinikasynyń habarlamasyna bailanysty pikir aitpady.
Resei prezidenti Vladimir Pýtinniń qarsylasy, jemqorlyqqa qarsy naýqan júrgizgen Aleksei Navalnyi 20 tamyzda Tomskiden Máskeýge bara jatqan ushaqtyń ishinde esinen talyp, artynan komaǵa túsken. Navalnyi ushaqqa otyrmas buryn Tomsk áýejaiynda bir kese qara shai ishken. Onyń jaqtastary sol shaiǵa ý qosylǵan dep sanaidy. Al ony Ombyda emdegen dárigerler buǵan deiin zat almasý protsesiniń buzylǵanyn, aǵzasynan qaýipti zat tabylmady dep habarlaǵan bolatyn.
