Pavlodardaǵy Dostyq úiiniń akt zalynda "Merkaz" oblystyq evrei birlestiginiń 25 jyldyǵyna arnalǵan is-shara ótti. Oǵan oblys, qala basshylyǵy, etnomádeni birlestikterdiń tóraǵalary, Semei qalasynyń jáne Pavlodar oblysynyń evrei ortalyqtarynyń ókilderi qonaq retinde qatysty. Qonaqtar men kórermenderge ortalyqtyń qurylý tarihy týraly aitylyp, «Merkaz» ortalyǵy daiyndaǵan qyzyqty kontserttik baǵdarlama ucynyldy.
Mereitoilyq kontsert «Mazal» horeografiialyq ujymynyń oryndaýynda ádemi «Shashý» qazaq biimen ashyldy. Oblystyq Qazaqstan halqy assambleiasy hatshylyǵynyń meńgerýshisi Jetpisbaev Seisembai Qalijanuly óz sózinde barlyq qatysýshylardy "Merkaz" ortalyǵynyń 25 jyldyq mereitoiymen quttyqtap, ortalyq qyzmetine sáttilik tiledi. Birlestiktiń belsendi múshelerin marapattaý rásimin E.M.Rahymjanov, A.G.Diak jáne E.S.Paýli jalǵastyryp, ortalyqtyń órkendeýine tilektestikterin bildirdi.
1996 jyly "Merkaz" ulttyq-mádeni ortalyǵynyń qaýymdastyǵy "Mitsva" evrei uiymdarynyń quramyna kirdi. Osyǵan orai mereitoi ielerin arnaiy quttyqtaý maqsatynda is-sharaǵa evrei qaýymdastyǵynyń prezidenti, Qazaqstannyń Eýroaziialyq evrei kongresiniń múshesi Aleksandr Iosifovich Baron atasalysty.
Osy tamasha kúni qonaqtar ortalyqty uiymdastyryp, damýyna zor úles qosqan adamdardy eske aldy. Olar: 20 jyldan astam «Merkaz» etnomádeni birlestigin basqarǵan Svechinskaia Faina Pavlovna, Leonid Shestak, Tatiana Liýbarskaia, Sofia Býrshtein, Marat Dinershtein, Svechinskii Leontii jáne basqalar.
Pavlodar oblysynyń damýyna eleýli úles qosqan evrei etnosynyń ókilderi arasynan Nahman Shafer, Grigorii Gýtnik, Lina Tarasýla, Moisei Krasnov, Valerii Stýpelman, Boris Kaminskii, Faina Shneerova jáne basqalardy atap ótýge bolady. Pavlodar oblysynyń etnomádeni birlestikteriniń tóraǵalary quttyqtaý sózderinde "Merkaz" ortalyǵyna úlken jetistikter tilep, estelik syilyqtar men diplomdar tabystady.
Mereitoilyq jiyn qyzyqqa toly boldy. Baǵdarlama "Mazal" horeografiialyq ansambliniń, "Anahný" án ujymynyń, "Teibelah" vokaldyq toby men "Tapýah" vokaldyq stýdiiasy músheleriniń oryndaýyndaǵy án-bilerimen, sondai-aq Abdyǵomar Qanat pen Dmitrii Nazarenkonyń oryndaýyndaǵy jeke ándermen tartymdy bola tústi. Al merekege arnaiy Semei qalasynan kelgen shyǵarmashylyq ujym ózimen birge qyzyqty bilerin alyp keldi.
«Merkaz» etnomádeni birlestiginiń 25-jyldyǵyna arnalǵan mereitoilyq kesh «Hava Nagila» atty ádemi ánmen aiaqtaldy.
.jpeg)